過去都有過幾段緋聞 周勵淇宣布婚訊升呢人妻

尋日周勵淇（Niki）喺自己社交網站宣布再加經理人-霍汶希親證，已經升呢成為人妻喇！其實Niki過往有幾段感情都唔能夠開花結果，對於閃婚，可以話係令人驚喜！

入行初期嘅周勵淇，曾經同馬偉豪導演傳出緋聞，不過女方一直未有承認。到2005年，因為同鄭嘉穎拍攝無綫劇集《天幕下的戀人》而戲假情真，成為真正戀人。據知佢哋一齊更係圈中公開嘅秘密。呢段情維持3年，有傳嘉穎被發現搭上佘詩曼，而令佢哋嘅感情正式畫上句號。分手後一年即2009年，Niki經過家姐周汶錡介紹下曾經同紗廠太子爺Eric撻著，不過有傳因為Niki逼婚，令到Eric家人反對，最終分手收埸。

2013年Niki拍內地劇《大漢賢后衛子丈夫》，同比自己年輕六年嘅徐正曦相戀。2015年二人突然宣佈分手。有報道指Niki分手數月前，認識一位喺北京經營石油嘅大亨。做得石油生意自然家底豐厚，所以同Niki初相識時已經送上唔少名牌手袋，但有指佢地只係親蜜來往一排就byebye咗。

早前Niki曾經接受Yahoo TV 娛樂訪談嘅專訪表示：「揀男仔條件係要自己鍾意同夾，覺得對方可以同自己好舒服同對方溝通，自己更因為見到好多朋友都可以同另一半唔需要拍拖拍得耐至結婚，所以自己都可以唔使拍長拖，岩就結婚然後生小朋友。亦都享受結婚後先慢慢拍拖，所以向話唔定會閃婚，因為我覺得夠刺激，雖然其實係講笑，但仍然相信要擋都擋唔住！」

果然，真係要擋都擋唔住，有咁多次戀愛經驗，Niki尋日宣佈婚訊，究竟邊一個先係佢真名天子呢？原來係傅浤鳴（前名傅程鵬），係一位現年45歲內地軍部演員，家境仲唔錯架。2017年3月跟有多達20年感情一直被公認為圈中模範夫婦嘅前妻正式離婚，倆人更育有一子，當時分手更震動到內地娛樂圈。Niki同老公傅浤鳴於2014年因合作劇集《臥底》飾演夫妻而變得更親近，由上年三月同前妻離婚至今年8月，傅浤鳴更被影到同Niki家人一齊聚餐，估唔到Niki突然正式公佈喜訊，已成為人妻，恭喜哂！