那些年 書展動漫節3大怪人

每年書展、動漫節開鑼都好似跑馬咁，個個排通宵，一開閘就極速狂奔，為嘅就係買到心儀嘅書、寫真、模型等等，就好似近日好hit嘅朱先生咁。不過呢班狂迷瘋狂嘅表現，為書展、動漫展帶嚟唔少笑點，等我哋重溫吓3個書展＋動漫節狂迷經典事件：

1.「雞排妹」寫真事件

今年2016書展，朱先生為咗購買「雞排妹」鄭家純嘅最新寫真，特登由凌晨三點開始喺會展排隊，但點知原來收錯風，寫真仲未推出而失望而回。事件被傳媒大肆報道，點知又真係「皇天不負有心人」，被「雞排妹」見到呢單新聞，仲親自回應事件，話出咗會送本署名及簽名寫真畀朱先生，仲話想喺香港簽名會同朱先生合照。有咩開心過自己偶像親自回覆自己？今次認真因禍得幅，畀人笑毒都無所謂啦～

2. 反智轉身事件

2007年動漫節，連續3年排頭位嘅莫先生，因為入場嗰陣無啦啦施展「施丹轉身」，因而成為媒體焦點。點知佢唔見咗票尾，被保安阻止佢入場，拉扯間仲畀保安箍頸，激動爭扎嘅不忿樣子令人印象深刻。最終出版社作出通融，畀佢排龍頭，成功買到心頭好。事後莫先生接受訪問，指自己有買飛，保安唔畀佢入場，佢係「唔能夠屈服喺呢種反智行為之下」，於是佢書展呢招轉身絕技自此就畀網民為稱為「反智轉身」。

3. 周秀娜頭號粉絲

2010年書展，鄭智殷先生因為購買o靚模周秀娜寫真集，並喺接受傳媒訪問時，言行舉止完美演繹何謂毒男，因而獲得傳媒同網民嘅注意。事後，鄭先生委託朋友喺Facebook上表示，書展中作出毒男嘅舉動，係為咗練吓演技去參加周星馳執導電影《喜劇之王2》嘅演員招募，加上被傳媒稱為「周秀娜的頭號粉絲」而成功「上位」。

圖片來源：TVB新聞、NowTV新聞、有線新聞、鄭家純＠Facebook