郭秀雲曾被傳媒呃 唔帶保姆影性感相 結果「被露點」

早前有港姐佳麗聲稱因合約條款而決定退選，TVB好快就出聲明澄清，強調同佳麗簽訂嘅合約公平、「合約條款均清晰透明，旨在充分保障雙方的合法權益」。而早前梁思浩喺youtube直播節目講起港姐合約話題時，指出因為歷年發生過唔同事情，令條款越加越多，更爆出選美出身嘅郭秀雲，參選期間被傳媒邀約私下影相，結果被安排著件好透明嘅服裝，仲拍下「露點照」，因此以後港姐佳麗都要有保姆跟身照顧。

翻查資料，郭秀雲（Sharon）參加1988年國際華裔小姐獲得季軍，並非參加港姐入行。有傳媒就此「露點照」一事向Sharon求證，佢直認真有其事，但並非於參選期間，而係比賽之後。郭秀雲憶述選完華姐之後有記者氹佢出嚟影相，但就以「TVB保姆好煩」為由叫Sharon唔好搵保姆跟身，當時郭秀雲不虞有詐答應記者。

Sharon指當時記者俾咗套性感衫佢著，當中包括一件tube top。但係拍攝期間記者係咁叫佢掹低啲件衫，Sharon拒絕並將件衫拉高，記者於是出手掹返低。郭秀雲認為應該冇咩影到，但原來記者做手腳喺佢個胸前「加色」，營造「露點」效果。最慘係Sharon話記者加嘅顏色同佢本身唔同色！結果呢輯相成為封面，郭秀雲先知俾人呃，喊足成個禮拜，不過經一事長一智，Sharon話學識小心處理，而家更加唔怕指證對方。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！