雅虎香港新聞 WeShare
郵輪新體驗
妹妹妹夫之前睇到有個去郵輪耍樂嘅團購活動，
星期一至四出發$249，
星期五六日出發就$299；
我哋見未玩過就一齊試下啦喂!
一行6人(包括祈祈)指定時間係下午6點係尖沙咀鐘樓集合，
做個簡單登記準時6點35分上接駁船去停泊在海中心嘅郵輪啦!
一上船要經過海關關員檢查身份證(仲會扣起身份證等落船先取回)，
攞房間後就先食晚餐!
其實晚餐食物選擇唔多，
食飽就算!
(可能通常嚟郵輪嘅朋友唔係諗住嚟食嘢啦!)
入到房間，
簡簡單單，
應該有嘅嘢都幾齊全架!
呢度都有幾樣嘢玩，
有麻雀枱、卡拉OK、賭枱、角子老虎機等等，
全部適合嚟賭博嘅人仕；
仲有按摩、足浴、桑拿、健身中心添；
好彩都有個小小玩具房啱祈祈玩，
咁啱又有2個小朋友一齊郵輪玩，
祈祈係玩到最唔捨得走果個呀!
妹夫就陪母親大人去做腳底按摩，
90分鐘$200，
算平嗎???
未夠鐘入賭場，(9點半先開門)
我哋走上甲板行下，
吹吹海風，
天和海漆黑一片，
好彩風平浪靜咋!
祈祈和母親大人就去小型玩具室玩，
我哋大人就緊係入賭場耍樂啦!
呢度大部份賭枱都係玩百家樂，
初初唔係咁識玩架，
不過睇幾舖已經知道哂玩法囉!
我冇下注，
全程都係老公和妹夫玩，
有冇輸贏???
贏返少少團費返嚟咁啦!
宵夜時間係12點至2點，
食埋個宵夜就返房瞓囉!
今朝5點幾隻郵輪就開始開動返香港，
我哋8點就落咗餐廳食早餐，
由於祈祈要返沙田學琴，
所以我哋揀咗9點15分就離開了。
(最遲離開時間係下午1點左右架)
今次全程船都行得幾平穩，
唔算好拋呀，
帶咗暈浪丸都唔使食，
妹妹妹夫話呢次坐郵輪經驗唔錯，
下次可以試下去遠少少，
玩返幾日都唔錯喎!
團購仲包每人一盒自製曲奇餅，
味道唔太甜，
老公都幾鐘意食呀!
大家可以入嚟Facebook讚下我新開嘅Fans專頁呀!
作者: 雀后
