鄭欣宜「療傷」2個幾月 被爆去廟街街頭演唱 仲同男友飛東京？

鄭欣宜(Joyce)早前被傳媒指掛住拍拖而「潛水」，近月隱身社交媒體之餘就連公開場合都唔見人，5月初佢獲得ViuTV嘅CHILL CLUB頒獎禮年度女歌手金獎，都選擇唔到場。Joyce嘅經理人林姍姍回應傳媒時話「Joyce的確係病咗，療傷之中」，但並未交代具體情況。

今日有媒體披露，「療傷中」嘅欣宜4月開始冇出席公開場合，但原來冇收埋自己，4月底佢就喺廟街同街邊唱歌檔嘅姐姐玩busking﹐仲素顏示人唱張惠妹嘅《聽海》，並且有一位金毛男陪伴，懷疑係早前盛傳嘅花店老闆男友Derek。去到5月中，有網民影到Joyce、Derek同髮型師好友Benjamin清晨時份抵達日本東京成田機場，相信係搭完通宵機。

Joyce突然失蹤，令到所屬公司寰亞頭都赤埋，畢竟近年欣宜喺女歌手當中獨佔鰲頭，兩奪叱咤女歌手金獎及我最喜愛的女歌手，CHILL CLUB年度女歌手金獎亦由佢冧莊，形勢一片大好。但係欣宜「潛水」近3個月之餘，仲連自己管理嘅社交平台都停止更新，唔少搵佢嘅廣告企劃都要hold住。加上有傳今年Joyce打算唔再出新歌，變相將金獎拱手他人。另外有消息指本來欣宜今年會有北上工作機會，包括傾緊參與TVB同內地湖南衛視合作嘅《聲生不息》，而家同樣因為欣宜嘅狀況而未能落實。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！