金宵大廈2 ︳搽黑手腳學菲律賓話演姐姐超搶眼 黃婉華唔做OL追尋演戲夢

《金宵大廈2》收視失利，但外間反應唔錯，最新單元《姐姐》入面，飾演黃子雄家中菲傭姐姐Louisa嘅並唔係TVB旗下藝人（唔係姜麗文呀！），而係舞台劇演員黃婉華(Franchesca)。由蘇玉華、王祖藍、張繼聰、泰臣、蝦頭到賴慰玲，演藝學院出身嘅演員拍劇都令觀眾眼前一亮，Franchesca都唔例外。

32歲嘅Franchesca為咗呢個角色做足功課，佢本身熱愛戶外運動膚色較深，但係埋位前都會再喺手腳搽深色啲。Franchesca仲搵屋企工人姐姐教佢菲律賓話，又搵網上片段模仿口音，甚至星期日去姐姐聚腳點搵「同鄉」吹水攞經驗。

Franchesca 喺加拿大出世，3歲跟屋企人回流香港生活，讀到中二返加拿大升學，喺卡加利讀大學時並唔係揀戲劇科，而係讀市場學。畢業後Franchesca又返香港搵工，做咗2年Marketing，期間發現演戲先係真正熱愛，毅然報讀演藝。放低4年大學所學再讀4年戲劇，身邊唔少人反對，但係Franchesca最終都堅持得住，在學期間仲拎到唔少獎學金。

畢業後黃婉華演過舞台劇亦拍過廣告，從未涉足電視圈，撞正《金宵大廈2》監製葉鎮輝想搵個合適嘅演員做姐姐角色，click去演藝嘅網頁發現Franchesca，再睇埋佢嘅網上短片，決定唔怕冒昧send email約見。Franchesca同葉鎮輝本身唔識，Franchesca一度以為係網上騙案。

黃婉華演戲以外，仲係一位有潛水牌嘅海底清道夫，幫手處理海底垃圾。Franchesca同英籍男友亦會一齊行山露營，十分好動！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！