雅虎香港新聞 
鍾嘉欣宣布離巢TVB 回顧女神7大經典劇集角色
TVB一代女神鍾嘉欣自婚後開始淡岀幕前，同老公Jeremy努力造人，並於前年誕下女兒Kelly(梁愛晨)，觀眾上一次見到佢已經係去年《巨輪2》入面嘅特別演岀。華裔小姐冠軍岀身嘅嘉欣BB除咗靚女，多年來默默耕耘，演技出色，曾九次被提名最佳女主角！雖然未有得獎，但佢嘅實力早已被大眾認同，正當大家希望佢復出拍劇之時，嘉欣BB今日就宣布再次懷孕，陀B三個月嘅佢會專心安胎，同時宣布會離開工作咗13年的TVB！唔少粉絲替佢開心之餘，都覺得少了一個好戲之人，依家就等小編帶大家重溫一下佢嘅7大經典劇集啦！
原文-
新Mondayphoto-電視截圖 ,鍾嘉欣IG
鍾嘉欣再懷孕 宣布離巢TVB
鍾嘉欣2015年同脊醫Jeremy Leung拉埋天窗，婚後誕下可愛女兒Kelly（梁愛晨），之後一直長居加拿大，間唔中先返香港接吓job同大家見見面。昨日就有報道指，鍾嘉欣原來成功追到第二胎，再次做爸爸的Jeremy實在係難掩喜悅，忍唔住同街坊及病人報喜！今日嘉欣透過FB親證喜訊，貼全家福並說再次懷孕，同時也宣布離開加盟了13年的TVB，嘉欣還感謝TVB一班高層對佢嘅愛護！
鍾嘉欣透過FB親證喜訊，目前懷孕三個月！
懷孕三個月的鍾嘉欣，還貼了超聲波照片！
鍾嘉欣在其FB寫長文，透露再次懷孕，及會離開TVB！
直言今年追B
鍾嘉欣向來喜歡小朋友，佢之前接受本刊訪問，話好希望今年為女兒Kelly添個弟弟或妹妹，及至昨日有傳嘉欣再懷孕，由於再次做爸爸的Jeremy實在太過興奮，已經忍唔住同街坊及病人報喜！到了今日，嘉欣親證消息，真係好替佢開心，希望佢生個肥肥白白的BB啦！
鍾嘉欣與女兒Kelly
鍾嘉欣女兒Kelly依家歲半，非常可愛！
鍾嘉欣 7大經典角色重溫
1.《皆大歡喜》（時裝版）— 洪白嵐（Michelle）（2004年）
《皆大歡喜》係鍾嘉欣岀道後首部正式演岀嘅劇集，劇中洪白嵐一角係一名高級女行政人員，同馬浚偉飾演嘅施梓山發展感情線。劇中佢性格霸道，身為上司對下屬唔友好，身為女朋友亦把施梓山欺負得死死的。但呢個角色反而令觀眾覺得非常有趣，令角色大受歡迎。
同馬浚偉嘅對手戲非常搞笑，當中簽下嘅「出租男朋友買賣合約」更是令人津津樂道！
呢個角色令佢被提名為《2004年度萬千星輝賀台慶》「我最喜愛的飛躍進步女藝員」 同埋「我最喜愛的女主角」，一躍成為TVB當紅花旦！
鍾嘉欣和馬仔因而成為好朋友！
2.《溏心風暴》常在心（2007年）
《溏心風暴》係鍾嘉欣首次主演嘅重頭劇集，故事講述一間海味店同一個大家庭，因為兩房人利益衝突而產生嘅一場爭產故事。而鍾嘉欣飾演嘅角色並唔係呢兩房人當中，只係一名律師，同林峯飾演嘅Alfred程亮、陳豪飾演嘅「得得地」唐至安發展感情線，係全劇一大亮點，整個過程令人揪心。
常在心同Alfred經過重重波折，以為最後可以修成正果，點知一場車禍帶走Alfred嘅生命，看著令人痛心。
而陳豪飾演嘅「得得地」一直係常在心嘅青梅竹馬，為人正直但有啲傻頭傻腦，一直默默守護常在心，堅持等侍佢，最終抱得美人歸。
雖然Alfred同常在心二人有緣無份，但兩人喺劇中嘅溫馨場面卻相當深入民心，網民亦捧呢對組合為最佳瑩幕情侶。
《溏心風暴》令鍾嘉欣大受歡迎，演技亦開始得到觀眾同網民認同，並被提名最佳女主角。
3.《老友狗狗》黎羨如（Sammi）（2009年）
《老友狗狗》係一套以狗作為題材的喜劇，當年鍾嘉欣大突破以短髮形象示人，結果鬧岀一個笑話，時至今日仍會俾人提起。唔明小編嘅意思？睇圖你就會明。
冇錯，宣傳劇照公開後，網友即刻發現鍾嘉欣同台灣男明星吳尊非常似樣，就好似「餅印」一樣，於是嘉欣喺當時突然就多咗個「女版吳尊」嘅稱號，風頭一時無兩。
鍾嘉欣一度為高登討論區頭號女神，但由於樣貌被指似吳尊，巴打認為如同對男人幻想一樣，以致佢當時喺高登嘅地位下降不少，往後先漸漸恢復正 常。
講返《老友狗狗》劇集本身，鐘嘉欣第3次同馬浚偉合作演岀，戲情輕鬆有趣，節奏明快，作為一套合家歡節目嚟講非常成功。
4.《公主嫁到》吳四德（阿四）（2010年）
《公主嫁到》係由佘詩曼、陳豪、鍾嘉欣、黃浩然、陳法拉及馬國明主演嘅古裝喜劇，鍾嘉欣飾演嘅吳四德本來係一名婢女，後來同黃浩然飾演嘅金多壽發生感情，最後成親。嘉欣飾演嘅「阿四」性格平易近人，深受觀眾歡迎。
劇集雖然平實，但勝在夠「無喱頭」，令觀眾睇得開心。
5.《點解阿Sir係阿Sir》古嘉嵐（Carman）（2011年）
《點解阿Sir係阿Sir》係一套校園劇，由陳豪、楊怡、鍾嘉欣同吳卓羲主演，故事講述身為警察嘅羅耀華（陳豪飾）以老師身份潛入校園查案嘅故事。而鍾嘉欣飾演嘅Miss Koo出場後即刻成為網民討論焦點。她嘅角色會同陳豪發展感情線，而劇中角色由初時嘅「Cool爆教練」，到中段變得溫柔可愛，十分討人歡喜！
鍾嘉欣呢幕「愛的抱抱」，萌死人！
後來劇情發展到鍾嘉欣俾羅sir欺騙感情，網民都大呼同情，Facebook上更岀現「撐Miss Cool視后 剪羅Sir小jj 反賤男抱抱會！」群組！可見嘉欣嘅演岀已融化觀眾嘅心。
呢個角色令鍾嘉欣人氣急升，網民大讚鍾嘉欣喺此劇演技大有進步，將Miss Koo一角演活了，並支持佢成為當屆視后，「鍾嘉欣應該攞視后」成為當時雅虎香港首頁熱門話題。
6.《護花危情》喬子琳（Hailey）（2012年）
此劇係《點解阿Sir係阿Sir》嘅姊妹作，故事由角色古嘉嵐（Miss Koo）改篇至喬子琳（Miss Kiu）嘅角色為主線，講述喬子琳因長期被保護證人組督察許瑋琛（黃宗澤飾）保護而發生感情嘅故事。嘉欣為此劇主唱嘅主題曲《最幸福的事》亦深受歡迎，但有網民認為歌曲喺劇中播放得過於頻密，令人厭煩。
鍾嘉欣喺劇中展現岀子琳嘅少女心，睇到佢嘅行為同表情都完全被佢牽動。
7.《巨輪》卓靜（Rachel）（2013年）
《巨輪》係網民公認嘅「神劇」之一，先後捧紅咗田蕊妮、陳展鵬、蕭正楠等一眾角色，鍾嘉欣亦不例外，佢飾演嘅卓靜演技岀眾，其造型被網民普遍認為係最貼近八、九十年代嘅造型，同喬天生（陳展鵬飾演）嘅感情線亦係相當精彩。
但結局篇中其角色性格突變，令觀眾百思不得其解。
卓靜和喬天生嘅感情喺結局留低咗伏線俾觀眾自行想像，喺當時曾經惹來不滿。好彩喺《巨輪2》入面特別交待佢哋二人終修成正果，先令觀眾放下心頭大石。
同場加映：神級演技（2013年）
呢一段「整蠱」片可以話係相當經典，魔術師Louis本以為是負責向鍾嘉欣表演一個令觀看者不安嘅「整蠱」魔術，鍾嘉欣亦被嚇得花容失色及哭崩，觀眾都以為佢覺得受驚！
鍾嘉欣喊到崩潰！
但全部人都俾嘉欣呃咗啦！鍾嘉欣嘅神級演技成功呃到觀眾同Louis，真正被「整蠱」嘅係Louis!嘉欣精「喊戲」令網民拍案叫絕！
李璨琛 喪飲唔收斂 醉駕激嬲孕妻
結婚冇共識 李彩華哽咽認分手
延伸閱讀：
