鐵拳英雄｜姚子羚5分鐘內由打女變毒癮發作 演技大爆發獲網民讚賞

TVB劇集《鐵拳英雄》正熱播，姚子羚於劇中演出尤其亮眼，所飾演嘅「金福妹」一角最拿手係奪命峨嵋刺，繼避過落藥迷姦一劫後，姚子羚近日演出毒癮大發一幕再次大曬精湛演技。

最新劇情講到，姚子羚被兩位哥哥施打毒針，後來為營救三哥使出峨嵋刺將對手擊敗，不過由於早前被注入體內嘅白粉針純度好高，姚子羚打完之後毒癮大發，唯有偷偷地匿埋注射毒品，連棘（陳山聰飾）見到呢個情況決定幫姚子羚戒毒，將佢困喺房中，結果令佢崩潰上吊，好彩最後都救得返。

喺前晚嗰集，姚子羚情緒大轉變，由打完到毒癮大發不足5分鐘，佢可以由打鬥場面嘅有型有款瞬間變成目定口呆咁掙扎，就連鼻涕都流埋出嚟，認真好演技。姚子羚出演打戲時同樣演技出眾，眼神銳利，氣勢十足；雖然唔係首次拍打戲，但姚子羚表示呢次形式唔同，有八成都係打戲，仲要學耍峨嵋刺，需要每日邊打邊即場學新嘢，所以都花咗唔少心機。至於，點樣著住性感嘅暹羅服裝都可以保持氣勢，姚子羚就話因為成日要露腰，絕對唔可以食肥，有時仲要縮肚拍攝。

姚子羚演技大爆發，唔少網民睇過佢嘅演出後都紛紛留言大讚，例如「福妹做得好好，好鐘意！」、「好型呀」、「呢個造型好襯你 好靚」、「真心覺得TVB 欠妳一視后」、「做得好好呀」及「佢去打個男人個段好正 超型」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！