鐵拳英雄｜韓馬利演技大爆發眼神識做戲 網民：真係好好戲

由TVB劇集《城寨英雄》班底製作嘅《鐵拳英雄》正在熱播中，劇集以曼谷唐人街為背景並以武打戲為主，唔少觀眾都大讚演員打得好精彩。除咗打得之人獲讚賞之外，一班好戲嘅老戲骨同樣備受關注，當中包括飾演趙紅花嘅韓馬利（Mary姐）。

最近劇情就講到趙紅花發現老公彭堅（張國強飾）同細妹趙紅月（梁琤飾）嘅姦情，之後佢去赤靈王廟意圖殺死紅月，但被彭堅阻止，紅花要求彭堅二選一，而彭堅最終選擇紅月，感覺被欺騙嘅紅花由愛意轉化為恨意。細妹就打算前往殺死佢，不過就被神秘人打傷，紅花更將細妹殺死。之後，紅花聯同本來係死對頭嘅福妹（姚子羚飾演）搵彭堅報仇，彭家夜總會突然爆炸，紅花仍然想舉刀襲擊彭堅，但彭堅指自己冇派人追殺紅花，紅花重傷倒地，臨死前向彭堅講出「神秘人」身份。

韓馬利喺劇中嘅氣勢十足及演技非常到位，要有型就有型，要奸險就有奸險，得到唔少網民留言讚賞，例如「我都有睇嗰一到 真係好好戲」、「綠葉藝人多演技精湛，值得支持，更值得尊重。Mary姐好野」、「紅花姐掂喎」、「馬利姐做奸角奸到入型入格， 這套電視劇經驗演員做戲真係冇得頂」、「馬利姐型爆」、「Mary姐啲戲好正」及「Mary姐對眼識演戲」等等。

現年67歲嘅韓馬利，於1974年代加入無綫，曾任舞蹈員及節目助理，佢喺1976年獲得監製賞識，於首套參演劇集《陸小鳳》飾演女一，之後幾套古裝劇都係由佢擔大旗。另外，佢更被安排擔任《K-100》主持。之後，佢曾兩度離開無綫，1992年後再度重返無綫後，佢演出過無數嘅劇集，演繹過無數嘅角色，例如《京華春夢》、《宮心計》、《名緩望族》及《把關者們》等等，演技備受觀眾認同。至於感情方面，Mary姐經歷過三段婚姻，1975年與與陳波比結婚，可惜婚姻只維持兩年。1981年Mary姐與馮寶寶胞兄馮吉隆結婚，可惜婚姻破裂，有指當時婚姻有第三者介入，令佢大受打擊更一度服藥自殺。後來，佢朋友就帶佢返教會，正正因為咁而認識杜燕歌，二人於1989年結婚，至今一直非常恩愛。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！