陪你走過高山低谷 盤點娛樂圈不離不棄好老婆

張穎康入行16年，近日終於吐氣揚眉，在《TVB馬來西亞星光薈萃頒獎典禮2016》奪得「飛躍男藝員」一獎。首次得獎嘅佢上台即爆喊，更坦言成功背後最大原因是有不離不棄嘅好老婆麥雅緻一直默默支持。張穎康曾經因為生計中斷演戲生涯，轉職文員，但一場車禍令佢決定重返演藝圈，當時老婆麥雅緻瀟灑咁放手讓老公追夢，更揚言：「頭家由我頂！」所以話，每個男人成功背後，都需要一個不離不棄嘅老婆給予無限支持。而娛樂圈中亦有唔少男明星擁有羨煞旁人嘅好老婆！

蔡少芬 張晉

2014年張晉以電影《一代宗師》入面「馬三」一角獲得香港電影金像獎最佳男配角，佢係台上對太太蔡少芬發表愛的宣言，感激對方一直風雨同路。蔡少芬係港姐出身，同時係當時無線嘅當家花旦，相反張晉只係一個寂寂無名嘅武術替身，所以當年佢下嫁張晉都有很多人唔看好！但張晉直言以前自己經常抱怨冇人欣賞自己，但幸好係最低谷嘅時候有太太陪伴左右，最後係十多年後終於陪佢捱出頭，令張晉不禁係頒獎台上向老婆示愛：「很多人我這輩子都要靠我老婆。對！我這輩子的幸福就靠妳呢！」令台下蔡少芬感動到喊晒口，幸福死人！

田蕊妮 杜汶澤

人稱阿田嘅田蕊妮近年事業起飛，頻頻擔正做主角，阿田外形好似好強悍咁，但其實佢係圈中出名嘅好老婆，陪住老公杜汶澤渡過好多風風雨雨，先有今日惹人豔羨的婚姻。二人相識時，杜汶澤已經賭債纏身，但阿田依然係朋友阻止下堅持借錢給杜汶澤應急。直到婚後，杜汶澤曾經因為經常失言而陷入事業低潮期，更加爆出婚外情。阿田面對接二連三嘅打擊，不但沒有大難臨頭各自飛，反而選擇同甘共苦，仲話：「一個人（杜汶澤）冇端端由冇人理嘅茄哩啡，努力加埋運氣，名利財富一齊嚟。我知佢仲好愛我，但當時見佢乜都冇晒，咪同自己講等佢好番少少先走。」決心陪過杜汶澤走過所有起起跌跌！最後杜汶澤沒有辜負阿田，對老婆一條心之餘，事業更加重新起步，後來更同時入圍金馬獎男主角同男配角。面對老婆嘅不離不棄，杜汶澤不禁公開表白：「希望男士都找到心目中的田蕊妮！」

江嘉年 梁家輝

梁家輝一直被譽為圈中數一數二嘅好老公，錫老婆錫到燶。但原來二人接近三十年嘅美滿婚姻背後，有段可歌可泣嘅故事，充分突顯出老婆江嘉年患難見真情嘅可貴。話說梁家輝初出道拍電影時因其出色演技而備受讚賞，但後來一度慘遭封殺，失業了一段長時間。恰巧係人生低潮時遇到當時做DJ嘅江嘉年，二人一拍即合，女方不但冇嫌棄家輝事業低潮，更加不離不棄，陪佢係夜市擺攤賺錢，又給予經濟上嘅支持，最後守得雲開，梁家輝更榮登影帝寶座。老婆多年來守護係隔離，難怪家輝每次得獎，都第一時間深情咁錫啖坐係隔離嘅老婆，仲每次行街都拖到實一實啦！

要有一段經得起風浪嘅愛情，首先要學識同甘共苦，因為能共患難才是真的有緣啊～

圖片來源：張穎康＠Facebook、杜汶澤@Facebook、田蕊妮@Facebook、張晉＠微博、星探妞@微博