雅虎香港新聞 陳健波讚警沒在立會內清場：如出現六四香港版打擊非常大
七一有示威者衝入立法會，並破壞部分設施，立法會財委會主席陳健波宣布，由於立法會有很多「災後工作」要處理，財委會未來兩星期都不會開會。他表示，警方昨日遲遲未有出動，是因為在立法會室內狹窄環境清場會很危險，不希望發生六四事件香港版，否則外國會乘機打壓、制裁，香港就「冇運行」，故稱讚警方處理得好。陳健波又說，立法會大樓的結構損毀將由政府承擔，預計損失數以千萬元計。
陳健波表示，大樓內的廣播系統、投票系統及中央系統全部毀壞，短期內不能開會：「秘書處要花很多時間做『災後重建』，而家滿目蒼夷，每一塊玻璃都爛晒，每一個位都有警員企喺度。換句話講，立法會而家好似冇掩雞籠咁，如果入面開會而挑起示威者情緒，其實好危險。我哋一定要確保喺大樓入面嘅議員、記者同埋其他人士嘅安全。所以決定呢兩個禮拜之內都唔會再開會。」
財委會目前有40多個項目需要開會討論，包括公務員加薪及橫洲公屋等。陳健波表示，由於轉移開會地點法律上比較麻煩，需要經過法律程序甚至登憲報，所以決定兩周內都不會開會，並已通知民主派召集人毛孟靜，她亦沒有特別意見。陳健波說，兩周後會視乎情況考慮加會：「究竟我哋呢個環境是否安全，議員會唔會聚焦財務問題，定係用呢個機會鬧政府，跟住樣樣都唔傾，然後又衝擊、又吸引更多人⋯⋯呢啲全部都要考慮，但我相信所有建制派都希望盡快處理這些項目。」
陳健波表示，大樓結構由政府負責，而政府建築物不會買保險，維修費用將由政府負責：「政府建築物全部都沒有買保險，因為政府本身夠財力。但是大樓裏的電腦系統、軟件或者非結構的部分，光是電腦都超過1億元，所以我相信損失是數以千萬元計。」他對立法會被破壞感到傷心，又表示從來沒有想過立法會會經歷這麼大的災難：「大家都好傷心，點解香港搞成咁。有啲人俾啲片我睇，直頭成個保安室徹底破壞晒，同埋有好多紀錄、磁碟都俾人搬走咗。其實係好有組織嘅人去做呢件事。」
警方昨日遲遲未有出動，陳健波指是因為在立法會內很危險：「如果大家短兵相接（在大樓內），警方的槍全部都是長途射擊，包括催淚彈都是很危險的，所以我覺得警方尋日處理得好，佢哋撤退先。大樓可以修補，但係人命傷亡唔可以修補，所以我覺得我哋好彩冇發生呢件事，如果有六四事件嘅香港版，對香港嘅打擊會非常非常之大，希望大家唔好睇小呢件事。」他批評部分議員質疑警方用空城計：「有啲議員話尋晚警方用空城計、放水，我係非常之反感嘅，因為佢哋咁樣做，其實係漠視咗當時嘅危險性。如果當時有幾百人衝入去，啲警員又同佢衝突，喺一個咁狹窄嘅環境，其實一定會有人命傷亡。」
陳健波表示擔心年輕人，希望法律界人士能告訴年輕人做什麼事會犯法：「大家看到圖書館沒有毀壞，他們也會自己付錢買飲品，但另一方面他們嚴重毀壞大樓。如果他們是依據自己的判斷做這件事，這是很危險的⋯⋯我希望這件事能令年輕人明白犯法就是犯法，雖然他的初心是好，但如果用錯方法，我恐怕會影響他們的一生，和他們的父母。」
陳健波發言期間，一直有人在採訪區外圍吵鬧，企圖阻礙陳健波發言，期間更有一男子走到咪兜前，要求陳健波回應現場民意：「後面啲人講嘢，嗰度都有民意，可唔可以回應下民意？ 」陳健波表示想先答記者問題，但該男子堅持要陳健波回應。陳健波則表示：「咩叫民主呀，呢啲咪唔係民主囉，人地而家訪問緊。大家覺得香港仲有冇民主呀，仲有冇言論自由呀？」之後數名男子緊跟陳健波離開，陳最終沒有回應該男子。
觀看原文： 按此連結
