陳建州打9折急售台北豪宅 范范撐夫聲明被揭係大話個唱被抵制

台灣藝人陳建州（黑人）近日身陷「#Metoo」風波，先後被3位受害女藝人指控性騷擾，其太太范瑋琪（范范）尋日（30日）就發文反擊，指自己大肚期間只有出門5次、屋企只有一張床等，以推翻「微風女神」郭源元指控黑人趁范范大肚，帶佢上屋企欲性侵一事。點知網友猶如柯南上身，於范范社交網睇相，發現佢懷孕時日子過得超充實，包括同吳青峰、林依晨、楊謹華、梁靜茹、阿雅、賈永婕等藝人碰面，仲參加名人生日P，又去戲院看電影，即取笑范范自打嘴巴。此外，范范大住肚同藝人出街嘅證據亦被一一翻出，包括同劉若英、梁靜茹聚會；與潘瑋柏聚會；搵姊妹淘唱K、挺孕肚力撐曾沛慈、到百貨公司放風，加加埋埋已經超過佢口中所講嘅「只有出門五次」。

網友再於11年前節目《康熙來了》中，范瑋琪親自提及家中仲有另一張床，家中有間客房可以畀上門搵黑人打機嘅朋友們過夜。回顧節目片段，當時黑人好友王宏恩亦透露，只要范范唔喺屋企，黑人就會立刻打電話邀人上門打機，昔日片段對照現今說詞，真係令人尷尬。

如今黑人爆出性醜聞，范范原計劃於9月8日喺台灣北流舉辦演唱會亦大受影響，大批網友喺社交媒體上洗版，表示要退票抵制！黑人捲入性侵未遂事件，網民已聲討作為PLG執行長嘅佢應該下台負責。網友同時亦不滿盲撐老公嘅范范，佢時隔4年將開個唱，儘管主辦單位先前宣稱演唱會門票已售出七成，但有網民發現在售票系統上嘅售票情況似乎相當慘淡。場館近5千個座位，分為六種票價，但只有最平嘅1,280元新台幣（約322元港幣）票價售罄，其他票價仍有相當多空位。

而網友更搵出黑人社交網仍然保留大牙指控嘅2012年7月香港出差相，黑人拍下大牙及Apple嘅相，當時二人均着熱褲上陣，黑人從旁拍攝唔同角度嘅相，其中一張就影到大牙喺鏡前整理衣服，一雙長腿被一覽無遺。

另外，有指黑人對於被前黑澀會美眉大牙指控性騷擾，黑人與范范出聯合聲明以民事訴訟的方式提告大牙，以維護自身名譽，要求大牙賠償兩人各500萬新台幣（約126萬港元），合計共1,000萬（252萬港元）。不過今日有之消息指台北地方法院表示已經收到陳建州律師遞交的起訴狀，但尚未繳清民事裁判費10萬元（約2.5萬港元），若未能在期限內繳款，法官可將起訴或聲請駁回。未知是否受到事件影響，黑人同范范出售位於台北嘅「愛巢」，該單位有「3房2廳3衛浴」，本來有傳去年開價5,766萬（1,450萬港元）出售，最後被發現打了9折，以5,208萬新台幣（約1,310萬港元）賣出，扣除車位單價為67.1萬（17萬港元），遠低於該社區其他單位的價格。