陳欣妍同時段現身兩台 主持《我推的野男LIVE!》完美撞《反起跑線聯盟2》

由胡蓓蔚、陸浩明、支嚳儀、火火主持嘅82台TVB Plus節目《我推的野男LIVE!》每逢星期一及二晚上9點30分直播，但因支嚳儀向節目組請假前往美加登台，所以今個星期嘅兩晚節目就搵嚟陳欣妍（Shirley）頂上做4集客席主持。同時，Shirley有份主演嘅ViuTV原創劇《反起跑線聯盟2》亦喺9點30分播出，換句話說，Shirley竟然可以喺同時段出現喺兩個電視台，真係好犀利呀！

現年31歲嘅陳欣妍喺2020年憑《美女郊遊遊》而人氣急升，前晚佢一連兩晚首次亮相TVB Plus，為《我推的野男LIVE!》代班擔任女主持，喺節目中著上黑色西裝褸，大騷修長美腿，十分吸睛。由於節目係直播嘅關係，所以Shirley一開始都表現緊張，去到後期先至稍為放鬆。而Shirley喺《反起跑線聯盟2》飾演早婚辣媽Pamela，與Locker飾演嘅楊飛係一對，去到今輯仲懷有第二胎添呀！《我推的野男LIVE!》及《反起跑線聯盟2》都係晚上9點半播出，所以Shirley同一時段出現喺兩個電視台。

不過火火同陳欣妍都出現於ViuTV節目，所以有網民誤以為自己睇緊ViuTV，留言：「shirley 唔係反起跑咩」、「Shirley Chan+火火以為睇緊99」、「點解會有Shirley Chan」及「成班ViuTV人過晒嚟？」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！