陳煒多口踢爆「今年嫁架喇」 朱晨麗同富二代男友今年拉埋天窗？

尋日係TVB賽馬日，全台一線藝人當然要撐場，2位份屬好友嘅花旦陳煒同朱晨麗都有到場。新正頭，圍訪嘅時候自然講下今年咩境況，尤其是朱晨麗舊年被爆同何廣沛分手之後，火速撻著富二代史昊洺，但係朱朱就話大家係朋友喎。咁記者當然想知朱朱下年會唔會派利是啦。

朱朱繼續口密，但係佢身旁嘅好姊妹煒哥就猛力助攻……幫記者助攻！首先陳煒就話朱晨麗「佢紅鸞星動，今年嫁㗎喇」，引起大家好奇係咪有好消息，朱朱即刻話「講笑啫」，之後一時語塞爆咗句「係啦……」，立即再被煒哥打蛇隨棍上「係囉！」。記者追問朱朱係咪蜜運中，當事人連忙否認，但煒哥同時答「係囉！」……喂你地真係姊妹？

咁朱晨麗係咪有追求者，陳煒就幫口答「梗係有啦」……啱嘅，女藝人冇人追仲得了嘅？轉頭煒哥再幫記者助攻答話「佢（朱朱）唔好意思啫！女仔怕醜，但唔認就唔得」。記者再問陳煒見過朱朱緋聞男友未，煒哥eh咗兩下，朱朱似乎真心驚，立即望住煒哥拎晒頭打眼色話「冇呀」，好明顯怕咗姊妹再爆料。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！