陶大宇繼水撥式台風 翻唱《甘心替代你》有新動作刺激觀眾眼球 網民：真係不得了

元祖級「師奶殺手」陶大宇近年不時出席內地商演，經常以劉德華《倒轉地球》及《愛你一萬年》作表演歌曲，喺2021年佢憑住獨特唱腔及「水撥式」台風喺網絡掀起哄動，更引起唔少人爭相模仿，而陶大宇亦因此喺中港兩地爆紅。近日陶大宇就拍住吳啟華及張兆輝喺內地開演唱會，喺表演期間佢竟然有新動作登場，令人喜出望外。

近日陶大宇就拍住吳啟華及張兆輝喺內地開佛山站演唱會，三人喺台上落力演出，展現師奶殺手嘅魅力，台下觀眾反應熱烈。最令觀眾期待嘅一定係陶大宇，佢喺演唱會中翻唱多首經典金曲，除咗《倒轉地球》之外，「新作」翻唱鄭伊健《甘心替代你》更有新動作，成功刺激觀眾眼球。喺佢唱出「彷彿天和地挑選我跟你」時，佢隻右手突然伸出食指，然後係「魂精」位置，做出快速旋轉動作，而佢嘅身體同時亦微微向前傾。

有網民將當晚嘅表演影片上載到社交網站，網民除咗大讚佢唱歌有進步之外，同時亦對佢嘅新動作嘆為觀止，例如「好像唱的也沒有說的那麼差」、「陶大宇竟然是這裡唱的最好的」、「進步好大，起碼地球無倒轉」、「哇 進步很多了」、「大宇老師真係無令大家失望，佢右手嗰個摩打式極速自轉動作，彷如同大家講：「個腦挑選緊！」、「技驚四座，真係不得了」、「終於有新動作」、「幾有台型」及「肢體和表情很自如」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！