雅虎香港新聞 電影LOL︳南北韓軍人「非官方協商」？新片6/45好笑程度拍住《炸雞特攻隊》
可能因為地緣政治背景因素，韓片好多時都會觸及南北韓政治局勢呢個話題，上星期介紹過「韓國譚俊彥」（?)李政宰首次執導嘅新片HUNT，就係以情報機關入面嘅諜戰為題材。多年前第一批引入香港嘅韓片《JSA安全地帶》都係以南北韓邊界一觸即發嘅緊張局勢下，兩地軍人嘅友誼側寫政治帶來嘅殘酷現實。
拎嚟拍喜劇又得唔得？得！早前上映嘅韓片6/45，可以話係喜劇版嘅《JSA安全地帶》。故事講述即將退伍嘅南韓兵長千禹（高庚杓飾演），某日喺兩韓三八線附近，執到一張飄向自己嘅6/45頭獎彩券（韓版六合彩，45個數字揀6個），獎金有57億韓圜(約3250萬港元）！點知又一個唔小心俾呢張彩券吹到去「這麼近那麼遠」嘅北韓。為咗實現退伍夢想，千禹使出渾身解數尋找彩券，但係被北韓士兵榮浩（李伊庚飾演）執到。對北韓人而言，去唔到南韓兌現彩券，呢張只係廢紙，再加上意想不到嘅「同謀」共同加入，雙方決定「越線」展開驚險刺激嘅機密協商……
上次提到HUNT係韓國三星期票房冠軍，剛過去周末屈居第二，正正因為被6/45打低。根據觀眾觀後感，有人認為好笑程度拍住《炸雞特攻隊》。卡士方面，高庚杓有份參演早前上映《分手的決心》，另一位主演嘅郭東延，就係去年大熱韓劇《黑道律師文森佐》入面，演大反派玉澤演嘅細佬。
向來韓片都有好多向八九十年代港產片致敬嘅味道，呢套聽落……都幾似《富貴逼人》！希望一樣咁好笑！6/45十月將會喺台灣上畫，香港暫時未見有發行商宣布購入，但係相信好快會有消息。
更多電影文章
電影LOL 今期睇咩戲︳孤疑前傳／獸獵／三千年的渴望／一日，在片場打雜的我，俾老細叫去做導演／惡的序章／拜金女王的性愛派對
電影LOL︳網友炒GAMESTOP打大鱷拍成電影 下個月開鏡 最強卡士係個導演！
電影LOL︳《爸爸可否不要老》導演再拍安東尼鶴健士 新片The Son再刻劃家庭事
電影LOL︳哈利波特繼續崩壞 Daniel Radcliffe爆炸頭二撇雞造型演一代惡搞歌王
電影LOL︳《魷魚遊戲》後升呢做導演 李政宰新片HUNT韓國票房連贏3周
電影LOL︳《明日戰記》開畫累積收近600萬 破今年華語片紀錄
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
