電影LOL︳20年賺過百億 外媒瘋傳《哈利波特》電影版籌備重啟

新一年,祝影迷們好戲連場!

近年睇外娛電影新聞成日見到reboot呢個字,即係將一套舊作重啟,好似拍完又拍嘅《蜘蛛俠》就係reboots典型例子。最新一套傳出reboot嘅,係《哈利波特》系列!簡單啲講,咪翻拍囉。

新年之前,外國爆料網媒WDW Pro話,擁有《哈利波特》電影開發版權嘅華納,有意喺未來3-5年重啟《哈利波特》系列電影,並且指華納內部負責《哈利波特》宇宙嘅小組,係度緊重新開拍《哈利波特》嘅可行性,但內部希望唔只係將以往嘅小說故事翻拍一次就算,而且部份角色會重新選角,又強調今次唔係發展近年由《哈》衍生嘅《怪獸》(Fantastic Beast)系列。WDW Pro重申,呢個意念仲係好初步,但由於《怪獸》票房麻麻,令華納有意重啟原裝《哈利波特》電影,吸納新一批觀眾。

去年新CEO David Zaslav上場後,華納嘅新聞多到好似追劇咁。而David Zaslav去年11月就提過,《哈利波特》幫公司搵好多錢,佢地亦有《哈》嘅開發計劃。

2001年第一套《哈利波特》電影《神秘的魔法石》面世,成為華納其中一隻生金蛋嘅鵝,由《哈》以至《怪獸》系列等作品,20年間帶來100億美元收益!計落,《哈利波特》全套電影當年用咗10年先全數上畫,假如3-5年後先見到《神秘的魔法石》新版,到時都已經係面世廿幾年;如果又係用十年時間出晒咁多套戲,到大結局嘅《死神的聖物2》時新版同樣係喺舊版廿幾年後出現,聽落都合理過而家上完幾年就重啟嗰批。

不過由於原作者羅琳早前涉及對變性者嘅不當言論,而家西方社會左翼當道,New York Times就曾經宣傳要移除羅琳係《哈利波特》作者嘅訊息。荷里活演員向來跟社會風氣以行動表態,選角上會唔會因此出現困難,可能係下一步華納要考慮嘅事。

更多電影文章

電影LOL 今期睇咩戲︳法貝曼:造夢大師/上流落水狗

電影LOL︳出年睇咩戲 嚴選2023年最值得期待電影

電影LOL︳爆頭刀劈乜都有 血腥暴力癲喪版《飄零燕》Mad Heidi上網有得睇

電影LOL︳入場捧邦女郎Ana點知戲份cut晒 影迷告《緣來自昨天》預告片誤導

電影LOL︳前途凍過水?The Rock確認DC新宇宙序章冇《黑亞當》份

電影LOL︳麥迪文推《阿凡達》片約唔見20億 占士金馬倫︰算吧啦

電影LOL︳《阿凡達:水之道》開畫票房僅僅合格 仍然好大機會破紀錄?

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!