【電影LOL】抗爭運動做背景 《時代》預告片出爐睇到有黑人問號

·3 分鐘文章

依家手機越嚟越多功能,新出嘅iphone 12根本就為網紅日常嚟設計,預你用嚟拍片、剪片,人人有個電話就可以拍片做導演。不過有硬件唔一定有美感,好似新片《時代》咁,張海報設計真係嚇死人!

《時代》今年7月開鏡,當時仲就返個故事特登喺茶餐廳搞開鏡拜神儀式,片中一眾演員包括楊明、莊思敏、莊思明、曹永廉、喬寶寶等人都有出席,最令人印象深刻係班演員嘅防疫意識,7月仍處於新冠疫情高峰期,一大堆電視演員出席開鏡儀式但無一個有戴口罩,加上附近圍觀湊熱鬧民眾,簡直係疫情傳播高危活動。熱心市民為咗防疫而報警,因此引起演員不滿,不過警察到場純粹了解之後就走人,活動繼續無罩進行!

事隔短短3個月《時代》似乎已經有預告片,電影簡介講明撐警同國安法,加入反修例運動片段,又有老豆鬧仔「供你讀大學,好做唔做走去做暴徒」等場面。不過未知係技術故障定套戲仲拍緊,預告片收尾又好突然,楊明生硬講咗2句對白後就完咗……而且,啲燈打到莊思明個妝好厚。

根據官方電影介紹,「故事以茶餐廳做背景,情侶因政見和工作誤會的爭執,新聞報道員面對大量虛假新聞信息的壓力,單親家庭受到經濟重創下的壓力,年青新一代對未來的迷茫,外國勢力下的洗腦式影響等。新聞報道員與香港警察攜手合作,並肩作戰調查,揭發一連串社會暴力行為,與外國干擾勢力有莫大關係。港區國安法成立,香港得以回復長期保持的繁榮穩定,香港居民合法權益得到保障;香港終於恢復秩序,國泰民安」。

因為「留意到社會發生好多不公義的事情,市民大眾對香港警察無理的抹黑、不真實報導記錄等等」、「希望此電影能夠警惕新一代」、「改變市民大眾的誤解,繼續支持香港警察」而創作《時代》呢套戲嘅「時代電影制作公司」由翟俊威、翟俊朗等「熱愛媒體的年輕人組成」,不過喺美感同立場方面似乎同時下年輕人背道而馳。

電影得到警察公共關係科嘅批淮,特別由楊明飾演嘅角色展示「速龍小隊」制服,早前曹永廉、莊思敏受訪時指《時代》立場中立,曾公開撐警嘅楊明又話娛樂圈無分顏色。但係相信無一樣嘅立場信念,無可能聚埋一齊拍《時代》,要讚佢地勇氣可加,堅守自己信念!

預告片就話套戲上9月7日,未知係指下年9月還是電影已經上咗畫?幾時上其實唔重要,相信單係包場,已經夠《時代》回本!

更多電影文章

【電影LOL】選美題材影視精選 呢套Netflix劇爆過Emily in Paris居然要腰斬?

【電影LOL】今個星期睇咩戲 《頭號殺姬》《蟲流感》《驚夢49天》《急先鋒》《逆權選美》

【電影LOL】楊千嬅出紀錄片回顧人生 呢班巨星嘅紀錄片講奮鬥史講埋政治

【電影LOL】大熱劇Emily in Paris女主角 3套Lily Colins走漏眼之作

【電影LOL】《花木蘭》效應 傳《神奇女俠》新片網上放映