雅虎香港新聞 電影LOL︳《奪命狂呼》翻炒收得 輪到《舊年暑假搞乜鬼》拍新版
橋唔怕舊最緊要受，荷里活瘋狂幫啲90年代舊片開續集，有鑑於上年《奪命狂呼5》搵返原班人馬加年輕新角色，滿足咗90年代《奪》影迷情懷之餘仲有薪火相傳嘅效果，成功將陳年系列回春，旋即開拍第6集！
根據外媒Deadline報導，Sony有意照《奪》煮碗，重啟1997年嘅《舊年暑假搞乜鬼》（I know what you did last summer）！《舊》改編自Lois Duncan1972年出版嘅同名小說，講述兩男兩女四個中學生為慶祝開派對，飲大咗醉駕撞死咗人！
眾人慌忙毁屍滅跡將屍體抛落海，並相互約定從此唔再提起此事。一年後，四人陸續收到寫住「我知你舊年暑假搞乜鬼」嘅匿名信，跟手有人殺上門尋仇⋯⋯
《舊》其實重啟過，2021年串流平台Amazon Prime曾經推出過同名劇集版，故事大橋一樣只係換咗主演演員。可能換湯唔換藥無咩新意，劇集推出完全無水花而且評價麻麻，imdb網得5.3分，所以做咗幾集就被腰斬！
所以Sony對今次重啟非常謹慎，據報上年秋天《雷神奇俠4：愛與雷霆》編劇Jennifer Kaytin Robinson同另一編劇Leah Mckendrick為《舊》續集度咗條靚橋，Sony高層當時雖然心動卻一直無行動。直至見到《奪命狂呼》票房口碑雙收，加上Robinson處女執導Netflix劇集Do Revenge大收歡迎，先至有信心《舊》重啟有得做。
重啟版將由Jennifer Kaytin Robinson執導、Leah McKendrick負責編劇，現階段正與原版主角Jennifer Love Hewitt及Ryan Phillippe磋商參演計劃，因為無佢哋成唔到事！
更多電影文章
電影LOL 今期睇咩戲︳巴比倫／24小時救參行動／絕地迫降／倒轉人生／敲敲門
電影LOL︳Marvel宣傳《蟻俠》新片識玩！戲中爆料新書真係有得賣
電影LOL︳James Gunn公布DC宇宙藍圖 《超人》打頭陣2025年暑假有得睇
電影LOL︳內地賀歲檔張藝謀《滿江紅》反勝劉德華《流浪地球2》《無名》靠口碑抗跌王一博唔駛揹鑊
電影LOL︳兩大阿姐碰頭交換身體 Amazon爭贏開拍Jennifer Aniston搭Julia Roberts合演新片
電影LOL︳爛片金酸莓獎提名12歲童星入圍 被狠批蝦細路立即撤回兼認錯
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
