雅虎香港新聞 電影LOL︳《閃電俠》靠口碑難救北美票房 《元素大都會》創Pixar史上最差開畫紀錄
正式公映前被譽為「史上最佳超級英雄電影」嘅《閃電俠》，開畫票房不似預期，北美本土地區收得最麻麻，首個週末3日收得5510萬美元，比預測開畫票房7000至7500萬低超多！
《閃》男主角Ezra Miller近年行為幾度失控，雖然事後道歉，不過工作全面暫停，華納連宣傳都無預佢，改行口碑策略，公映前2個月已出現大量好評，連巨星湯告魯斯都力撐，好評吹到有咁大得咁大！
可能期望越大失望越大，《閃》公映後好評未能持續發酵，滿心歡喜以為有幾代蝙蝠俠，結果備受期待嘅Michael Keaton條線鋪陳不足，空洞無味，電影唔錯但未至於「史上最佳」！
《閃》亞洲地區票房表現亦麻麻，大票倉中國票房開畫3日收得9000萬人民幣，遠差於預期；韓國開畫排第3， 收380萬美金（約2900萬港元），排喺《犯罪都市3》及Pixar《元素大都會》之後。雖然香港首日錄得240萬、台灣首周錄得5600萬台幣（約1200萬港元）算成績理想，不過兩地市場相對較細，好收極都未能止蝕。
同期上映Pixar嘅《元素大都會》喺北美成績一樣麻麻，開畫3日錄得2950萬美元，為Pixar 28年嚟最低開畫電影！據聞《元》拍攝成本唔比《閃》低，整部動畫用咗2億美金製作，單睇開畫數字一樣回本無望。
外媒分析，《元》以水、火、土等大自然元素，講人與人之間嘅不同，題材難以吸引家庭客。加上疫情期間，迪士尼多部動畫直上串流平台，又或者上映不久就可以喺Disney+睇到，影響咗觀眾入戲院意慾，仲有評語認為Pixar創作現疲態，多年敍事方程式如一，了無新意。
「超級英雄」唔再係救票房靈藥，華納嘅DC更係重災區，接連幾部《黑亞當》、《沙贊！眾神之怒》到今次《閃電俠》全部蝕本收場。連被視為心靈雞湯大人細路都啱睇嘅Pixar亦接連失利，睇嚟片廠要好好研究創作新方向，靠IP及招牌名氣食老本似乎唔再行得通。
更多電影文章
電影LOL︳《職業特攻隊︰死亡清算 上集》被睇好至少收8億美金 導演大口氣︰打贏Top Gun
電影LOL︳新片Maestro成獎項大熱 畢列谷巴轉型做導演被力捧 已經傾緊下套戲
電影LOL︳迪士尼《元素大都會》身負救票房重任 張敬軒Serrini聲演水火不容嘅愛情故事
電影LOL︳Amber Heard潛完水 月尾現身電影節宣傳新片 隨時同前夫Johnny Depp 同場
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
