雅虎香港新聞 電影LOL︳內地騙徒氹水魚做電影出品人呃錢 有晒批文宣傳片仲帶團做考察
騙徒越嚟越專業！近日上海搗破一宗電影投資騙案，涉案金額更高達4.9億人民幣！據內地《新民晚報》報道，2022年11月警方接獲報案，受害人因為受電影投資廣告吸引，同「電影」聯合出品方會面，會上對方詳細介紹製作成本、票房預測以及當時投資金額，仲講明實際票房並唔影響投資回報。
內地電影製作金額高，一套戲有多個大大小小出品公司屬常態，騙徒為咗增加可信性，註冊同成立超過10家文化及影視公司，請哂人做中介代理，又拍哂片介紹，仲洗好多錢落廣告。佢地又會組團帶隊實地考察，過程中受害人要求嘅文件如電影立項書、批文都有齊，唔似有假。
騙徒準備嘅資料實在太詳細，兼且金額唔算大，受害人不虞有詐，忽略咗「必賺」呢個最大嘅疑點，自願俾100萬投資3部電影。3部電影如期上映，不過到合約分紅時，受害人並無收到錢，追數時搵唔到人先發現自己被騙！
類似嘅騙案之前都發生過，騙徒眼見《長津湖》電影大賣，打住《長津湖》續集旗號吸引投資人，唔少市民誤信所謂嘅小型投資出品方，又誤信《長2》有高回報而投資數十萬至過百萬人民幣不等，騙局最終於電影上映後無錢收返而爆鑊。
其中一位受害人與北京公司「朝朝暮暮文化傳媒」簽咗《電影《長津湖》上集收益權轉讓協議》，用3萬買咗對方百分之零點○○六嘅投資分額股權，之後騙徒失聯先被揭發。據聞《長津湖》及其續集上映前，有至少20家公司賣緊呢2套戲嘅投資分額，雖然真正嘅投資出品公司博納影業強調，並未授權第三方公局為電影融資。
各大電影公司除咗宣傳都出好多澄清聲明，不過類似嘅騙局依然存在，金額有大有細。好似即將上映、為支持亞運會街舞比賽嘅電影《熱烈》，一樣被騙徒攞嚟做侃子，話只需幾百幾千蚊就可以出現喺片尾演職員名單。不勞而獲嘅投資唔好信呀！
更多電影文章
電影LOL︳《閃電俠》靠口碑難救北美票房 《元素大都會》創Pixar史上最差開畫紀錄
電影LOL︳《職業特攻隊︰死亡清算 上集》被睇好至少收8億美金 導演大口氣︰打贏Top Gun
電影LOL︳新片Maestro成獎項大熱 畢列谷巴轉型做導演被力捧 已經傾緊下套戲
電影LOL︳迪士尼《元素大都會》身負救票房重任 張敬軒Serrini聲演水火不容嘅愛情故事
電影LOL︳Amber Heard潛完水 月尾現身電影節宣傳新片 隨時同前夫Johnny Depp 同場
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
