電影LOL︳荷里活2022年五大仆直大片 迪士尼囊括2.5套 《奇異大世界》勁蝕15.5億

連香港電影金像獎都完滿結束，2022年嘅電影年結都……仲有一樣好重要嘅排名未講。外媒Deadline同各大片廠計數，睇下舊年邊套戲蝕錢蝕得最勁。畢竟「最佳xx」嘅獎項都係錦上添花，賺定蝕老細最著緊！

結果無寶不落嘅迪士尼喺去年失手，五套仆直大片當中包辦2套半！即刻數榜～

第5位－《巴比倫：星聲追夢荷里活》

有齊近年極速上位嘅Margot Robbie同觀眾緣唔錯嘅Brad Pitt，又係大堆頭歌舞片，但因為觀眾反應麻麻，「爛蕃茄」評分得56％，全球票房得6330萬美元。由於套戲開工時間撞正新冠大流行令拍攝成本上升至超過8千萬，埋單結果《巴》要蝕8740萬美元。

第4位 － 《決戰38度線》

舊年《壯志凌雲︰獨行俠》係威係勢狂掃15億美元，但唔代表同樣係以戰機為題材嘅戲會一樣收得。最妙係影評分唔差，頂多係撞正同《黑豹2》同期上映，但總之票房就係唔得，最終要輸近9000萬美元。

第3位 － 《光年正傳》

《反斗奇兵》番外篇，聽落以為可以食到《反》嗰浸fans啦啩？正正因為Toy Story死忠追求原汁原味，唔係由原本為巴斯光年配音嘅Tim Allen發聲，改由「美國隊長」Chris Evans上陣，加上劇情有bug同Toy Story唔夾，仲有上映前嘅宣傳無聲無氣，即使全球收近2億3千萬美元，但對於迪士尼動畫而言算麻麻。終於《光年正傳》打破迪士尼不敗神話，估計儀1億600萬美元！

第2位 － 《阿姆斯特丹》

又係有Margot Robbie！唔係一姐嚟嘅咩？同樣因為疫情，《阿》成個拍攝地點要由波士頓改為洛杉磯，成本由5千萬彈上8千萬。即使呢套星光熠熠嘅大片，有好多串星都因為導演David O. Russell名氣而只係收友情價，但係以一戰時期為背景，觀眾0興趣。成本高票房差，仆直就難免，呢個代價盛惠1億7140萬美元，計返港紙等於13.5億左右！《阿》由迪士尼負責宣傳，所以「功勞」計半套。

第1位 － 《奇異大世界》

《奇》有好多奇思妙想同以往迪士尼動畫唔同，甚至有同志角色，而迪士尼亦安排電影上感恩節檔期。不過觀眾唔buy就係唔buy，仲破埋迪士尼出品動畫有史以來最低北美開畫數字。眼見套戲唔收得，迪士尼轉陣喺上畫一個月後放上串流平台，起碼止一止血。可惜最終都輸差唔多2億美元，計港紙即係15.5億！

更多電影文章

電影LOL 今期睇咩戲︳燈火闌珊／關我Love事／非常亂婿娶佳人／伊朗無熊無懼／陽光燦爛的果園

電影LOL︳《Marvel 隊長2》聲勢靜過太空 朴敍俊騎呢造型成唯一亮點

電影LOL︳輪到《魔海奇緣》拍真人版 The Rock毫無懸念做男主角

電影LOL︳《Barbie芭比》真人電影海報預告片曝光 同Christopher Nolan新作《奧本海默》打對台

電影LOL︳伊藤潤二有份參與 荷里活改編《新・闇之聲 潰談》避過日漫被荷里活拍爛宿命？

電影LOL︳奇連伊士活疑似拍收山之作 算死草CEO終於開綠燈批准

電影LOL︳畫面繼續對稱 卡士繼續大粒 Wes Anderson 新片Asteroid City 6月有得睇

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！