雅虎香港新聞 電影LOL︳伊藤潤二有份參與 荷里活改編《新・闇之聲 潰談》避過日漫被荷里活拍爛宿命？
美國對改編日漫成電影或電視劇有異常執著嘅偏愛，亦有異常高嘅出事機率，由《龍珠》到近期嘅《聖鬥士星矢》次次雷聲大雨點小，成功嘅項目寥寥可數，即使唔拍真人版，單單影像化都出事。
Netflix近期推出，將日本恐怖漫畫家伊藤潤二嘅20個故事改編成12集劇集《伊藤潤二狂熱：日本恐怖故事》，都係逃唔出呢個「定劣」，換嚟劣評如潮，被評得陰暗卻空洞。
不過依然無阻荷里活繼續改編日漫。近日外媒Variety報導，Fangoria片廠將會改編伊藤潤二《新・闇之聲 潰談》其中3個故事成為電影，首部將推出《吸血之闇》，並由《陰宅異事》（The Haunting of Hill House)編劇Jeff Howard執筆。
Jeff 擅長恐怖題材，之前執筆兼監製過Netflix嘅迷你劇《午夜彌撒》（Midnight Mass）及電影Oculus（台譯《鬼遮眼》）而受好評。Fangoria成立於1979年，係恐怖界翹楚，甚有影響力，每年仲會搞Chainsaw Awards選出每年恐怖之最，不過直到2021年先成立片廠正式拍攝影視作品。
早兩年已經有計劃將伊藤潤二作品真人化，美國曇花一現嘅短視頻平台Quibi計劃改編《富江》成劇集，同Sony Pictures Television共同出品，搵埋《水行俠》編劇David Leslie Johnson-McGoldrick執筆，由女星Adeline Rudolph飾演富江。不過因為平台唔夠一年就玩完，連帶《富江》都無埋。
對於是次合作，將同時出任監製嘅伊藤潤二大表興奮，表示希望今晚就夢到個預告片！伊藤潤二作品改編難度甚高，心寒氣氛不可少，嚇人之餘又要交代出人性黑暗，是但少咁樣元素會淪為空洞爛片。今次作者有份參與，希望電影改編成功，原汁原味，唔會因為太低質而嚇破膽！
更多電影文章
電影LOL 今期睇咩戲︳白日青春／國王的伸冤／鏡之孤城／名偵探柯南 灰原哀物語～黑鐵的神祕列車～
電影LOL︳奇連伊士活疑似拍收山之作 算死草CEO終於開綠燈批准
電影LOL︳畫面繼續對稱 卡士繼續大粒 Wes Anderson 新片Asteroid City 6月有得睇
電影LOL︳3億美金製作費回本有望？《狂野時速10》獲批中國內地上映
電影LOL︳梁朝偉獲威尼斯影展頒終身成就獎 成首位華人演員得主
電影LOL︳爛片王The Room大導Tommy Wiseau食夠老本 新片玩大白鯊越爛越開心
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
