雅虎香港新聞 電影LOL︳爛片王The Room大導Tommy Wiseau食夠老本 新片玩大白鯊越爛越開心
邊有人估到一套爛片可以紅足20年，甚至成為Cult界經典？由長毛電影人Tommy Wiseau自編自導自演嘅荷里活世紀爛片王The Room今年20周年，早前為美國愛滋病研究基金會amfAR籌款而推出過「重啟版」，不過新版由執導到主演都換哂人，男主角改經典美劇Breaking Bad以及衍生作Better Call Saul嘅男主角Bob Odenkirk飾演。
主腦人唔係Tommy Wiseau 套戲即時無咁爛，而20年嚟不停為The Room宣傳及推出周邊商品嘅Tommy終於推出新作Big Shark，繼續由Tommy Wiseau自編自導自演，電影講述新紐奧良受大白鯊襲襲，3個消防員合力拯救家園嘅故事！
BIg Shark剛剛推出全新預告，片段完全睇唔出有消防員，剩係不停見到2、3個瘦削嘅哥哥仔喺擂台上彈下彈下，鏡頭一轉就見佢哋因為被鯊魚追而喪跑！無錯，人喺前面陸地奔跑，鯊魚自帶浪花喺後面冲住上嚟，電腦特技效果非常9流！
電影預告片得1分鐘，不過佢硬黐多條1分鍾Tommy Wiseau自創同名品牌內褲廣告喺預告片度先放上YouTube焗你睇。廣告充滿濃濃嘅因為80年代低清風格，鏡頭及模特兒一齊扭嚟扭去，連條底底咩樣都睇唔清！未知電影正片會唔會有大量底褲置入，不過相信觀眾都唔會介意，仲希望Big Shark越爛越開心！
其實Big Shark 喺2019年已經推出過預告片，當年條片CGI一樣流，不過叫睇到個劇情精華，兼且見到The Room 另一男主角Greg Sestero。4年後嘅新版包埋預告同海報都唔見Greg，唔知係咪辭演咗，因為新版預告同2019年嗰條完全唔同，似重新拍過！
據外媒The Variety報導BIg Shark將於4月2日於美國波特蘭Cinema 21戲院作全球首映，Tommy Wiseau亦會隨片展開為期8個月嘅全國巡迴放映，同FANS見面Q&A，完成巡迴後仲會推出有別於戲院公映版唔同嘅「官方最終版」！Tommy Wiseau拍唔出好片，但佢生意頭腦一流！
更多電影文章
電影LOL 今期睇咩戲︳殺神John Wick 4／龍與地下城：盜亦有道／戰地孤聲／微笑與夏溫／Love Life
電影LOL︳《小熊維尼：血與蜜》香港突然取消上映 發行公司無原因解釋
電影LOL︳塔倫天奴收山之作？第十套作品拍70年代女影評人傳奇
電影LOL︳荷里活世紀爛片王The Room 居然都有人翻拍！
電影LOL︳楊紫瓊關繼威「全家」新劇重逢 《西遊ABC》吳彥祖演孫悟空
電影LOL︳金草莓獎謝拉列圖成最爛影帝 兩屆金像影帝湯漢斯都有獎攞？
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
