電影LOL︳《小熊維尼:血與蜜》香港突然取消上映 發行公司無原因解釋

曾被票選為2023年最期待電影第一位嘅英國恐怖電影《小熊維尼:血與蜜》原定本周四於香港上映,早前仲舉行過優先場,片商喺現場準備咗主角血腥維尼嘅頭套被大家影相,認真有心!不過距離上映唔夠2日,片商VII Pillars Entertainment突然宣布取消電影上映!電影公司冇講明原因,只係同觀眾道歉,日後會為大家帶來更多電影云云。

《小熊維尼:血與蜜》以低成本製作,只係拍咗十日,主要戲謔呢位家傳戶䁱嘅童界巨星,而所以可以惡搞維尼只係因為原著嘅獨家版權期滿,肖像變成人人可以用。《小》原本無打算大型上映,不過有踔頭、夠爽而走紅變成全球上映!

出品《小》嘅公司仲話未來計劃開拍黑化版《小飛俠》、《小鹿班比》等,擺明食gimmick多過拍好電影!電影有話題唔等如好,睇返電影網站IMDB及爛蕃茄(Rotten Tomatoes)嘅評分都低到無倫,堪稱爛片。不過爛片睇唔睇係個人選擇,重點係有得㨂睇唔睇維尼同小豬黑化!

VII Pillars專頁出過《小熊維尼:血與蜜》上映戲院名單,似乎連院商都好支持呢套年度話題之作,優先場又搞過,萬事俱備似乎唔關「技術原因」事,突然抽起唔上又無明確原因,確實令人疑惑兼心多。

套戲一早已評為三級,低成本製作擺明賣暴力、血腥兼色情,劇本故事都弱弱地,話恐怖片又得成人版笑片又得,似會曇花一現然係被淡忘,依家突然抽起唔上反而仲多人留意!

Yahoo 向商經局轄下電影、報刊及物品管理辦事處查詢,電影報刊辦回覆指,已向《小熊維尼: 血與蜜》影片檢片申請人發出核准證明書。惟有關香港戲院安排哪些已獲核准電影在其院內上映純屬其商業決定,電影報刊辦不作評論。

更多電影文章

電影LOL 今期睇咩戲︳沙贊!眾神之怒/那個男人/中國乒乓之絕地反擊/平凡英雄

電影LOL︳塔倫天奴收山之作?第十套作品拍70年代女影評人傳奇

電影LOL︳荷里活世紀爛片王The Room 居然都有人翻拍!

電影LOL︳楊紫瓊關繼威「全家」新劇重逢 《西遊ABC》吳彥祖演孫悟空

電影LOL︳金草莓獎謝拉列圖成最爛影帝 兩屆金像影帝湯漢斯都有獎攞?

電影LOL︳奧斯卡得獎導演 拍Elon Musk紀錄片

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!