靈戲逼人｜阮浩棕備受TVB力捧劇接劇 網民：明年飛男一定有你份

由龔嘉欣及張振朗領銜主演嘅TVB劇集《靈戲逼人》喺星期一（3日）正式開播，有睇嘅觀眾相信都留意到飾演「文武生」方浩東嘅阮浩棕（Nicholas），因為今套已經係佢連續第三套劇出街（《靈戲逼人》、《隱門》及《隱形戰隊》），明顯備受力捧，更被網民指都有機會奪得「飛躍進步男藝員」。

阮浩棕今次喺《靈戲逼人》中飾演熱血追尋粵劇夢嘅「文武生」方浩東，與劉穎鏇飾演嘅葉敏敏係情侶關係，戲份一啲都唔少。今次佢為求突出角色，除咗為角色特意練大隻同曬黑，仲向去上堂學粵劇，向謝雪心（心姐）及現場嘅一位文武生幫忙指導。

現年32歲嘅阮浩棕出身自演藝世家，爸爸喺前亞視監製阮惠源，二叔阮惠熊喺麗的電視造型設計指導及演員，而嫲嫲就係已故資深藝人梁舜燕。阮浩棕畢業於喇沙書院及香港科技大學，透過第27期TVB藝員訓練班入行，以主持兒童節目為主；2017年曾經離巢到北京發展，出演過《招搖》、《七劍下天山之修羅眼》等劇集及電影，2020年重返TVB，同時簽約邵氏兄弟，客串《愛·回家之開心速遞》飾演米剛追求熊心如（蘇韻姿飾）及於《我家無難事》一劇中飾演年輕版關禮傑等等。

拍劇機會越來越多嘅阮浩棕，今年更連續有三套劇集出街，分別係《靈戲逼人》方浩東、《隱門》Ethan及《隱形戰隊》鏗少，角色有正亦有邪，可以挑戰演技嘅同時，成功俾觀眾睇到唔一樣嘅佢，令佢成功入屋，兼大讚佢可塑性高及有望奪「飛躍進步男藝員」，例如「可壞可好，可塑性極高」、「戲接戲好犀利啊！！希望套套戲都收視長虹！！」、「又有你新劇，支持」、「Nicholas今年好多劇出,唔知異空感應會唔會接靈戲逼人播呢」、「細佬好Chur⋯⋯男飛躍預定」、「明年飛男一定有你份」、「你劇接劇，今年好大機會」及「棕哥犀利吖，之前拍嘅劇，都緊接著出街，好開心又可以睇你嘅劇，預祝早日你登上男一位置」等等。另外，明顯備受力捧嘅佢，待播及拍攝中劇集仲有《異空感應》、《非常檢控觀》及《死有對証》，觀眾仲有大把機會見到佢嘅演出。

阮浩棕對「星三代」呢個身份一向低調，因為佢想靠實力睇下自己可以行到幾遠，入行時從未對外公開係梁舜燕孫仔，直至梁舜燕舉行入行六十年慶祝晚宴，阮浩棕為其擔任司儀先公開二人關係，阮浩棕仲喺社交平台表示：「以『我係梁舜燕孫仔』身份感到自豪。」2019年梁舜燕逝世，阮浩棕亦發長文表達對嫲嫲嘅尊敬：「我應承妳嘅事亦會做好，因為我係妳嘅孫，亦因為我繼承咗妳嘅衣缽，所以我會努力捍衛妳嘅名譽。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！