韓國女性最想嫁男人 劉在錫又攞第一

各位男士，如果你仲係認為自己唔夠靚仔所以無女朋友嘅話，大家不妨睇吓以下嘅問卷調查，可能可以俾到靈感你點樣能夠成功吸引到女仔。啱啱韓國KBS 2TV訪問咗1000名女性，問佢哋邊個係佢哋「最想與他談戀愛」嘅對象，蘇志燮憑8.4%支持率成為各位女性最愛，大神劉在錫就以7.1%僅接其後，而金秀賢就憑4.3%支持率成為第三。而喺投「最想與他結婚」中，劉在錫就有高達16.7%嘅支持率，跟住就到車勝元，而蘇志燮就成為季軍。

劉在錫
雖然經常被人笑佢醜樣，但係大神劉在錫完全印證咗「我很醜，但我很溫柔」呢句說話。被稱為國民MC嘅劉在錫份人出名好、無架子，所以亦被稱為零差評藝人嘅男神。風趣幽默嘅佢手持《無限挑戰》、《Happy Together》、《Sugar Man》、《Running Man》、《同床異夢，沒關係沒關係》等節目，有幾豬籠入水唔洗多講。仲有報道話佢仲自費幫以上節目嘅所有劇組工作人員購買禦寒衣物添，而且由出道至今都冇緋聞。又善良、又有錢、又細心、又專一，識揀一定係揀呢Type。

蘇志燮
有樣有身材當然會有市場啦！鍾意啲有肌肉嘅就會揀蘇志燮，本身係一名游泳健將嘅佢攞夠獎之後就開始加入娛樂圈，去到「對不起，我愛你」嘅時候就爆紅，成為頂級男演員，啱啱係《Oh My Venus》入面金英浩嘅角色就瘋魔唔少女士。

金秀賢
曾經瘋魔萬千少女嘅都教授除咗同大家證明咗外星人唔一定醜樣之外，佢文質彬彬嘅硬朗書生氣質，兼且會保護身邊女士嘅性格先至係最殺食果樣。雖然佢外表同身材唔算特別突出，但係反而有時呆呆地，不解風情其實對女仕來講都係一種魅力。

車勝元
同樣身為型男嘅車勝元係節目《一日三餐》入面就展示咗佢驚人嘅料理實力，佢仲會仔細咁做家務，又會囉囉嗦嗦咁，令佢俾人叫做車大媽。雖然成個師奶咁，但係亦令佢人氣升咗唔少。不過係係電視劇《華政》入面，佢扮演忠厚正直嘅領導就完全散發出佢嘅魅力。亦因為咁，佢成為咗2015年最佳男性廣告代言人第一名。證明住家男人都係有市場架！