顧定軒疑捲入三角戀 陳凱詠拒愛並與陳健朗復合？

ViuTV大型選秀節目《全民造星III》掀起全城熱話，雖然節目喺上年年尾已經圓滿落幕，不過一班參賽者嘅未來動向及戀情，繼續成為話題。繼Carmen（關嘉敏）疑似暗撻CY（陳澤言）狠飛天堂鳥成員Gordon後，今日有報道指顧定軒（Zeno）亦捲入三角戀情，疑戀上歌手陳凱詠（Jace）與導演兼演員陳健朗拗手瓜。

報道指Jace與陳健朗喺幾年前因朋友介紹後認識及撻著，直至上年分手。而Jace同Zeno就識於微時，仲因4年前拍攝《瑪嘉烈與大衛系列：前度》重遇並開始熟絡，不過當時Jace同陳健朗拍緊拖，所以Jace同Zeno只係好友關係，只要Jace有事嘅話Zeno都會即刻幫手。後來，Jace同陳健朗因聚少離多而感情轉淡分手，Zeno經常陪伴在側，最後更展開追求，有指佢哋喺上年11月被撞破一齊去睇達明一派嘅演唱會。但Jace拒愛顧定軒，與出席完台灣金馬獎嘅陳健朗復合。

另外，上年顧定軒演出陳凱詠嘅歌曲《隔離》MV，飾演情侶嘅佢哋喺拍攝期間非常投入，更毫無顧忌咁喺鏡頭前打情罵俏，當時已經傳出二人假戲真做，佢哋就話係有真感情，不過只係友情。

喺接受傳媒查詢時，Jace就話佢同Zeno係好朋友關係，其他嘢唔回應；Zeno就話Jace同陳健朗都係佢好朋友；而陳建朗同時亦表示顧定軒同Jace都係好朋友，之後被問到係唔係同Jace拍拖及傳Zeno追求Jace時，佢就話冇正面回答，仲表示唔清楚及叫傳媒問返佢哋。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！