【風光背後】江美儀曾受情緒病困擾11年

現今社會壓力大，好多人都受到情緒問題困擾，而喺娛樂圈，唔少藝人都背負著沉重嘅壓力而容易患上情緒病，有啲更因此結束生命。

近日喺無綫劇集《殺手》中飾演「一樓一」阿嫻嘅江美儀，劇中對患病老公不離不棄，為咗賺錢醫老公而要做「一樓一」，不惜角色扮演嚟吸引客人，唔少網民都大讚佢好演技。風光背後原來江美儀都曾經受情緒病困擾好多年，食足11年藥去控制病情。

現年48歲嘅江美儀，喺16年宣布同拍拖11年男友吳君祥分手，又俾老爺夏春秋踢爆二人原來早已秘婚，佢向傳媒回應時話自己之前有情緒病，如果連分手都要交代嘅話，佢接受唔到。

江美儀細細個已經要半工讀，又要幫阿媽供樓。入行後就算做到亞視當家花旦，佢都唔係成日有工開，當時佢成日喊問點解無人搵佢拍劇。而感情方面，吳君祥長期中港兩邊走，更曾經傳出有第三者，之後又被爆二人唔係分手而係離婚，又要出黎公開道歉，搞到江美儀受到好大壓力。

受情緒病困擾多年嘅佢，好彩搵到令自己冇咁負面嘅方法，面對留言佢積極回應，好似係《衝上雲宵ll》中佢同馬國明有連場激烈牀戲，被網民鬧佢「老牛吃嫩草」，佢反擊指「你哋去到佢嘅年紀時，可以keep到咁先講」。最終，佢由被人負評如潮到被大家極力讚賞好演技。而感情方面佢亦享受單身生活，學會愛自己。