雅虎香港新聞 飯壺設計的重要性
對於打工仔，非sales 要成日見客嘅，一般都希望帶飯，尤其是當家下成日都話成功需父幹，想上車冇父幹，又或想儲錢結婚搞大龍鳳嘅廢青，就更加想帶飯。鬼咩，食個頹飯都四十幾蚊，喺商業區更加唔止，如果你住得遠，加埋交通費，仲要計埋拍拖消費，條數真係好甘。
好嘞！懂B.M.都知我因為健康同味精敏感為主要帶飯理由。飯壺由細用到大，阿婆款，一格過；進化點，分隔保溫款；再進化一盒過，翻叮。終於俾我遇上呢個潮型工廠妹型飯壺！
曾經有專家話，容器大，裝多咗兼食多咗。呢個一抽兩隔，細可裝飯，咪講少，壓實份量夠一碗。一抽剛好放入Longchamp 餃子袋中號佔三份一，有空間放化妝袋呀、遮呀頂住，打棟加埋真空蓋唔怕被撞至打側而漏汁。明顯用四方盒份量起碼多三份一，所以留俾老公。(偷笑中)
第一次用示範(半小時搞定)：
細放飯，大放餸。今日煮了有味雞。
1. 先洗米煮飯，雞下脾肉切丁，用豉油1湯匙、荳粉1茶匙、糖1茶匙、紹酒1湯匙、茴香籽、五香粉、芫荽籽各半茶匙醃半小時。
2. 甘荀半條切片，薯仔一個切丁，飛水備用。
3. 洋蔥一個切絲、京蔥小段切絲(可無)。
4. 中火平底鑊落少許油爆蒜蓉，煎雞丁，我用個煎字因為要兩邊微焦先好食。快炒做唔到呢個效果。將半熟熟雞丁撥埋一邊慢煎，騰空半邊鑊炒洋蔥。
5. 快炒兩分鐘後落黑椒少許，再於鑊中間落少許牛油，將雞丁混埋洋蔥一齊炒。
6.放入另一個爐頭正完全飛水嘅薯仔同甘荀一齊炒。水可繼續用嚟灼菜。
7. 埋獻，蠔油湯匙, 兩茶匙糖，一茶匙荳粉50ml水攪均，轉大火，加入京蔥絲靜止煮2分鐘。
如果你成隻脾上你一定食得晒，但變相食多咗肉。一隻脾其實夠兩個人一餐肉嘅份量，因為根據營養師，成人一餐肉份量等於手掌心咁多咁厚！
因為薯仔本身係飽肚，飯可以減少。有肉有菜，至緊要有味，仲要半小時搞定！ ^^
P.S. 飯壺購自Lost & Found, L8, The One, Removal Sale 呀！正價7折！手快有呀！另有橙色！
———————————–
包包‧ Bakingmaniac
官網： https://bakingmaniac.wordpress.com/
FB: https://www.facebook.com/bakingmaniac.bm/
作者: bakingmaniac
