【駕入馬鞍山】去有機農場「睇」驗耕種
淨係識揸車去飲飲食食?咁唔得喎,小學生都識啦,「粒粒皆辛苦」吖嘛,種植食物背後係有好多被人忽略嘅辛勞,唔親身體驗過唔會知。而家成日講親親大自然, 唔少人放假都會去自耕農場租塊格仔田,試下自己種植食物嘅滋味,落下田出一身汗,睇住啲農作物一日一日長大,食都食得滿足過人。
![](https://s.yimg.com/ny/api/res/1.2/NYFRn3daiQxAEHCqBiiyow--/YXBwaWQ9aGlnaGxhbmRlcjt3PTk2MDtoPTYzNg--/http://40.media.tumblr.com/530ddbb0c38a2a90759cb1b71eadd46b/tumblr_inline_o3aojsTVtZ1t4qai9_1280.jpg)
睇見農作物有收成,即使唔係自己種都好戥人開心。
有機農場,新界好多地方都有,不過下下要入到元朗錦田又好似遠咗啲。 其實近近地馬鞍山都一樣有,位置就係大水坑附近。如果揸車去,可以喺手機地圖輸入「大水坑村」或「富安花園」,入到路口未到巴士站轉左,就有一大排錶位, 有冇位就睇你彩數啦,啱啱星期日中午去過,都唔算Full嘅。萬一咁唔好彩冇位,都可以泊遠少少嘅錦泰苑,行隧道返過嚟大水坑,路程大約十分鐘左右。
![](https://s.yimg.com/ny/api/res/1.2/.abUN1Q.tLN7aaH8gEhmRw--/YXBwaWQ9aGlnaGxhbmRlcjt3PTk2MDtoPTYzNg--/http://40.media.tumblr.com/ee283fc8e215df512cae26d28a939548/tumblr_inline_o3aol9hVMz1t4qai9_1280.jpg)
農場好近單車徑,跟指示行上石級就搵到。
當你泊好車喺錶位,一路向馬鞍山方向沿住單車徑行,冇幾遠就會見到自耕農場嘅 指示牌,跟住箭咀拾級而上就會去到,一啲都唔難搵。農場除咗出租格仔田俾人種植之外,亦都開放俾人參觀,無論係管理人或嚟種嘢嘅人,大家都好友善,見到得 意嘢不妨隨便發問,大家都唔介意分享自己嘅作品同種植方法,所以呢度好有農村嗰種純樸氣氛,連啲貓仔狗仔都嗲過人,任摸任玩唔嬲。
![](https://s.yimg.com/ny/api/res/1.2/NMeXRmxqTLeL3HSb.KlloA--/YXBwaWQ9aGlnaGxhbmRlcjt3PTk2MDtoPTYzNg--/http://41.media.tumblr.com/1d995050115c07faca1aa4826b2096f0/tumblr_inline_o3aomhIKRn1t4qai9_1280.jpg)
呢度係馬鞍山市中心外圍郊區,附近有幾個居屋屋苑。
行入農場範圍,第一樣聞到嘅係肥料味,係唔……臭嘅,其實冇肥料又 點會種得出咁多植物,而呢度講明係有機耕作,唔會用化肥同農藥,所以有大自然嘅味道係好正常嘅事。行多幾步,發現一排排圓碌碌嘅植物,原來係椰菜!啲葉一 層層包得好靚,問真啲先知原來種到咁大個要花四個月時間,真係唔係街市俾十蚊八蚊買就有咁簡單。椰菜附近仲有幾棵士多啤梨,不過因為唔當造,睇個樣有排都 未有得食。
![](https://s.yimg.com/ny/api/res/1.2/mPN6bqDRYGQZKmVplnoJMQ--/YXBwaWQ9aGlnaGxhbmRlcjt3PTk2MDtoPTYzNg--/http://41.media.tumblr.com/5cd310c30bcda81f838985ef3854497f/tumblr_inline_o3aoo1zhXT1t4qai9_1280.jpg)
認唔認得出係咩菜?係油麥菜嚟喎。
![](https://s.yimg.com/ny/api/res/1.2/p8baCG3lB6nZhC4gnTt5JA--/YXBwaWQ9aGlnaGxhbmRlcjt3PTk2MDtoPTYzNg--/http://41.media.tumblr.com/ee12c43357246b980a04c779cbc395c2/tumblr_inline_o3aopyvrzu1t4qai9_1280.jpg)
啲椰菜幾靚!要種幾個月先有咁大個。
![](https://s.yimg.com/ny/api/res/1.2/TfWQZe4JIQHUa753hT98Kw--/YXBwaWQ9aGlnaGxhbmRlcjt3PTk2MDtoPTYzNg--/http://41.media.tumblr.com/de1127dd9a6ce29485890ee8ca655094/tumblr_inline_o3aoquhpq61t4qai9_1280.jpg)
指天椒唔一定要種落地,可以用盆仔種。
![](https://s.yimg.com/ny/api/res/1.2/bsQkhpYHCRoR7JOe0QU6Gw--/YXBwaWQ9aGlnaGxhbmRlcjt3PTk2MDtoPTYzNg--/http://41.media.tumblr.com/d1090607193ab9e33f7cb3a68d8c4c33/tumblr_inline_o3aos4ukSY1t4qai9_1280.jpg)
包到咁密實係乜嚟?其實佛手瓜。
![](https://s.yimg.com/ny/api/res/1.2/.UebuFuEMOYhH7B49iivTQ--/YXBwaWQ9aGlnaGxhbmRlcjt3PTk2MDtoPTYzNg--/http://41.media.tumblr.com/8cfa263eace332a2fdf4700b5bd5f3c5/tumblr_inline_o3aoufZDGl1t4qai9_1280.jpg)
呢啲唔係聖誕裝飾,係防止啲雀仔啄食嘅裝置。
![](https://s.yimg.com/ny/api/res/1.2/FB7FnTww1AzKNBlospTGng--/YXBwaWQ9aGlnaGxhbmRlcjt3PTk2MDtoPTYzNg--/http://40.media.tumblr.com/ffe1819b7372219557f89cbc9a7fd872/tumblr_inline_o3aow4GWPQ1t4qai9_1280.jpg)
呢籃蕃茄個個都好大,不過要再擺下熟啲先食得。
![](https://s.yimg.com/ny/api/res/1.2/wZ7Og_Fo8x0AbuZ4yjkv_A--/YXBwaWQ9aGlnaGxhbmRlcjt3PTk2MDtoPTYzNg--/http://40.media.tumblr.com/09bc19671cd3db0832a21ce5a8bbb11a/tumblr_inline_o3aox2TUrT1t4qai9_1280.jpg)
呢個紅卜卜就以食喇。
![](https://s.yimg.com/ny/api/res/1.2/CKCJksPHwe.1N9AFXz3IiQ--/YXBwaWQ9aGlnaGxhbmRlcjt3PTk2MDtoPTYzNg--/http://41.media.tumblr.com/19854ee025e8797d9712f2b8254c4df1/tumblr_inline_o3aoycHyfT1t4qai9_1280.jpg)
整沙律常用嘅牛油生菜。
![](https://s.yimg.com/ny/api/res/1.2/UBX9fKp4ui.8YqPhY.1O1w--/YXBwaWQ9aGlnaGxhbmRlcjt3PTk2MDtoPTYzNg--/http://41.media.tumblr.com/f1d97c86eb7bd2f0a8c33f6b6a912f57/tumblr_inline_o3aozilGvA1t4qai9_1280.jpg)
都係沙律常用嘅紅菜頭。
![](https://s.yimg.com/ny/api/res/1.2/VKDFYZg2Ftnr6KxIRDE7jg--/YXBwaWQ9aGlnaGxhbmRlcjt3PTk2MDtoPTYzNg--/http://40.media.tumblr.com/92af5e60453df75b67392a55006928d0/tumblr_inline_o3ap09lwYN1t4qai9_1280.jpg)
好大支白蘿蔔露晒出泥面。
聽管理人講,租一塊格仔田大約四百零蚊一個月,而種嘢係講長遠計嘅,所以要簽約12個月,咁 先夠時間俾你體驗一年四季耕作嘅變化。大部分種嘅都係時令蔬果,冬天種菜夏天種瓜。雖然呢排撞啱係種植交接期,去到現場都見唔到好茂盛嘅場面,不過睇番佢 哋面書又真係幾多種類,有洛神花啦、魚翅瓜啦、秋葵啦、苦瓜矮瓜節瓜啦……聽講過多陣就可以開始種青瓜,而家眼見就多數係菜。
除咗椰菜仲有咩菜? 有好多平時街市見得多,但好少喺田見到嘅菜,例如油麥菜,有好幾塊田都種緊。考下你吖又,除咗打邊爐食佢啲葉,油麥菜仲有邊部分食得?答案就係條莖,搣晒 啲葉之後剩番好粗壯嗰碌就係嘞,刨走層皮入面嘅肉好爽好甜好嫩可以生食,好似竹筍咁,所以又叫做萵筍。另一種自耕農場常見嘅菜係沙律菜,例如羅馬尼亞生 菜、牛油生菜同紅菜頭等等,呢個農場都有唔少,特別係紅菜頭,好多都種得好靚。
其他靚靚農作物包括好大支嘅白蘿蔔、好大揪嘅蕃茄同好大隻嘅 佛手瓜。即使唔打算租塊田親自玩下,嚟到呢度睇見啲瓜菜自然成長,不其然會心生一股滿足感,同你喺街市見到啲疏菜係完全兩回事。有小朋友嘅話帶佢嚟呢度, 上一課最好嘅自然教育。咪以為種嘢好小兒科,好多瓜菜品種同種植方法,城市人係唔會知道同明白,睇完之後會你會更加尊重食物。其實呢度地方真係唔遠,位處 馬鞍山市中心外圍,揸車經過石門迴旋處冇耐就到。而且睇完農場仲可以落下面個單車公園租車踩,沿住單車徑可以由山邊踩到去海邊長廊,租一日都係幾十蚊,一 個地方兩樣玩法,你話方唔方便嘞。
![](https://s.yimg.com/ny/api/res/1.2/B.9Hz_teYI3JvIKno3X8ug--/YXBwaWQ9aGlnaGxhbmRlcjt3PTk2MDtoPTYzNg--/http://41.media.tumblr.com/2b6a0e96ff49cc79711ae1a474509d21/tumblr_inline_o3ap0uBkrT1t4qai9_1280.jpg)
呢隻喵星人係農場大使,周圍撩人玩。
![](https://s.yimg.com/ny/api/res/1.2/eK.ROhVZkTUzA_8nRBt5qA--/YXBwaWQ9aGlnaGxhbmRlcjt3PTk2MDtoPTYzNg--/http://40.media.tumblr.com/1b2f0c808551d59b555ef7a4cb0b8183/tumblr_inline_o3ap1yMgdm1t4qai9_1280.jpg)
農場附近有單車公園。
![](https://s.yimg.com/ny/api/res/1.2/iBYkyPBAJzR_3L9lPDrhnw--/YXBwaWQ9aGlnaGxhbmRlcjt3PTk2MDtoPTYzNg--/http://40.media.tumblr.com/da4c1ef81ecfee10ee1e8c94c259656d/tumblr_inline_o3ap3m6YBV1t4qai9_1280.jpg)
雙座位、四輪車、輔助轆乜車款都有。
![](https://s.yimg.com/ny/api/res/1.2/BhiUdL4LDvuzqiL4EEncKw--/YXBwaWQ9aGlnaGxhbmRlcjt3PTk2MDtoPTYzNg--/http://36.media.tumblr.com/d9ca7c89b47476250b54b53309a0c0c9/tumblr_inline_o3ap4lP3zf1t4qai9_1280.jpg)
大水坑有唔少錶位,遠少少泊錦泰苑都得。