黎展峯靠自己升呢撻番着團火 眼濕濕感激家人：我可以照顧到自己

黎展峯（Andy）全新廣東作品《免費升級》歌曲及MV今日（13日）上架。新歌的誕生及靈感，由Andy自身出發，歌曲正好呼應他剛經歷的一個迷惘期，「前排唔知點解自己個人冇咗團火，無論唱歌、演戲，都覺得需要好大好大嘅進步，所以同陳永謙講咗話想做一隻比較熱血啲嘅歌曲，於是直接用咗『熱血』呢個Terms等佢發辦，最後就有《免費升級》呢個誕生。所有歌詞、歌曲本身輕快嘅節奏都燃番起我心入面嗰團火，去繼續推動自己進步。」

歌曲除了為自己打氣，同時亦希望鼓勵跟他一樣，生活中感到迷惘或意志逐漸被磨滅的人，「有時我哋嘅生活重重複複做同一樣嘢嘅時候，就會磨滅咗心入面嗰團火，又或者覺得生活過得好無聊、好渾噩，除咗身邊有好多人提醒你，其實你亦都係一個最好嘅角色去睇番起你自己、燃番起自己團火。正當係因為你自己睇起自己，自己去訓練嘅時候，係一樣免費嘅嘢，所以都希望大家可以藉住呢首歌去提醒自己，為自己提升，咁就可以免費升級。」

Andy亦找來好友黃浚銘（Boris）及Shin拍攝MV，Andy表示這次是他找來最多人幫手拍攝的MV，當中最感謝的是他的fans，「有一個場景係講我有一個簽唱會，所有嘅fans都係睇住我由一開始出道，到而家我再燃番起自己團火，所以我覺得呢隻歌都係報答佢哋一路支持我。」除此之外，Andy更藉着這首歌，多謝一直支持他的家人。Andy坦言雖然比較少跟家人傾心事，自己亦不多時間了解他們的生活，但經常感受到他們滿滿的愛，更眼濕濕謂：「佢哋會問我：『幾時有歌出呀？』、『幾時有嘢拍呀？』但我通常會：『呀，就嚟有啦、就嚟有啦。』好少分享一啲內心嘅感受俾佢哋聽，但係喺呢度都好想真真正正咁同佢哋講聲多謝，希望透過呢隻歌話到俾佢哋聽我慢慢成長緊，希望嚟緊可以做到更多嘅嘢去證明俾佢哋睇，佢哋個仔係可以照顧到自己。」