點心放題2023！銅鑼灣$138任食90分鐘、米芝蓮推介高質點心

放題唔係日韓專利，中式點心一樣可以放題。有時同人去飲茶每人分一粒咁都唔係幾夠喉？咁就睇睇今期介紹嘅幾間點心放題餐廳啦，有米芝蓮同酒店級，亦有平民啲嘅連鎖酒樓，豐儉由人。

$138任食創意點心 名館

新派中菜推出嘅全新點心放題，90分鐘無限任食超過30款嘅粵式新派點心！款款點心都好精緻，如銀湖天鵝酥，金黃酥脆嘅表層包裹住微甜嘅紫薯蓉，外皮酥香，餡料甜而不膩。筍香蝦餃皇都係招牌，每件蝦餃都會用上一隻半蝦，啖啖飽滿。除咗點心仲有好多小食都係任食，如鎮江水晶餚肉，桂花鐵棍淮山、雲南涼拌貓耳朵等，午市任飲私房靚湯包括四季椰子雞湯及霸王花豬展湯，真係好抵食～溫提記得早一日上官網訂先享有到呢個價錢㗎！

米芝蓮高質點心 國金軒

估到米芝蓮餐廳都有點心放題食呀～供應26款點心選擇，雖然選擇唔算話特別多，但勝在款款點心都好高質素。如蟹子蒸燒賣，蝦肉同豬肉比例啱啱好，燒賣有肉汁，蝦肉彈牙，加埋粒粒蟹子更有口感。松茸上湯小籠包皮薄餡靚，一入口係滿滿嘅湯汁，仲帶有香濃松茸味。法國鵝肝荔芋角都值得一試，法國鵝肝同芋蓉融為一體，蜂巢都超鬆脆，果然係米芝蓮嘅質素，仲有得任食3小時呀～

任食150分鐘 君綽軒

呢間一樣可以坐低慢慢食，供應35款特色點心、燒味及小食～蒸、煎、炸、焗嘅點心通通有，如最基本嘅蝦餃燒賣、特別啲嘅五香鹹蒸粿、甜梅菜叉燒腸粉、香滑炸脆奶及香麻叉燒酥盒等等。仲有8款甜品如清心丸綠豆爽及薑汁豆腐花，每位惠顧點心放題之賓客可免費獲贈蠔皇鮑魚酥及豐料養生靚湯乙客添～

街坊抵食之選 御名園

呢間連鎖酒樓嘅點心放題一向都幾有口碑，平日$148就可以任食，即係大約食5籠就可以回到本啦～幾推介佢哋嘅特色煎炸點，如芝麻芋絲脆軟夾，師傅先將芋頭製成細蓉，再夾上舖滿芝麻嘅糯米面層，外脆內軟。仲有金網黑松露煎窩貼、芋絲脆香春卷、鯪魚肉煎釀尖椒、酥炸大良鮮奶以及千層飄香榴槤酥都好吸引呀。

文: Yanica