因社會氣氛不明朗 鼎爺旗下餐廳中環分店宣布結業

李家鼎（鼎爺）縱橫演藝圈多年，入行時擔當一位龍虎武師，到近年與譚玉瑛拍攝烹飪節目《阿爺廚房》盡顯功架，結果大受觀眾歡迎，除咗電視、廣告及出食譜等工作接踵而來之外，前年仲開始殺入飲食界，當時餐廳未正式開業就已經爆晒，一圍難求。鼎爺先後開咗3間餐廳，不過噚晚喺「鼎爺私房菜 Ding's Kitchen」嘅Facebook專頁宣布中環分店將於下月22日結束營業。

喺噚晚，「鼎爺私房菜 Ding's Kitchen」Facebook專頁就出發文話：「中環分店鼎會館光榮結業．有緣再聚。鼎會館將於2019年11月22日(星期五)結束營業，承蒙各界一路支持，讓我們能為大家提供傳統手工粵菜。我們歷史雖不悠久，但團隊上下以最真誠的心感謝每一位曾光顧本店的客人，感恩得到各位的鼓勵和意見，在經營路上我們一直堅持以高品質食材、傳統烹調方式，以及原汁原味的方針傳承粵菜，務求讓食客就算在講求成本效益的城市中仍能品嚐到傳統手工粵菜的滋味。

但礙於經營壓力上升，社會氣氛不明朗的情況下，我們只好忍痛讓鼎會館暫別大家，並將精力集中於《鼎爺私房菜》及《鼎尚棋哥燒鵝湯館》，發展海外市場，繼續宏揚粵菜精髓。臨別秋波，大家記得要把握機會到鼎會館共聚最後時光啦～再次感謝各界的支持🙇🏻‍♀鼎爺私房菜集團上」

其實呢間餐廳喺上年9月先開張，據知投資額達1千5百萬港幣，以手工菜作賣點，唔少網民都估唔到咁快結業，紛紛留言話可惜：「十分十分可惜。食物及員工服務水準都好好😞」、「好可惜， 繼續支持！」、「可惜，盡量抽空在結業前來光顧。👍」及「可惜，很可惜」等等。

而對於今次宣佈結業一事，有傳媒就向鼎爺了解事情，不過鼎爺就話自己剛剛收外景，對呢件事完全唔知情，需要問一問拍檔了解咗先。同時鼎爺亦話如果真係執笠都係冇辦法先咁做，一切可能都係上天嘅安排。