《2020勁歌金曲》胡鴻鈞周柏豪齊奪「最受歡迎男歌星」 網民:知唔知個最字點解

·5 分鐘文章

樂壇最後一張成績表《2020年度勁歌金曲頒獎典禮》喺噚晚圓滿結束,席間共頒發50個獎項,當中星夢歌手菊梓喬(Hana)獨攬5.5個獎成大贏家,包括三首金曲、與林峯合唱嘅《低谷天堂》獲得「最佳合唱歌曲獎」銀獎、「最受歡迎網絡女歌星」及「最受歡迎女歌星」。而最受歡迎男歌星就由胡鴻鈞及周柏豪一同奪得。想知網民對頒獎典禮有咩感受?快啲轆落去睇啦!

場面冷清
於將軍澳電視城舉行嘅頒獎典禮出席人數不多,絕大部分都係星夢及英皇旗下歌手,連無綫藝員龔嘉欣及羅天宇都係座上客,不時影到後面一大片「吉位」,真係睇都覺得尷尬。唔少網民睇完都留言:「小貓三四,大部分人唔識,舞台寒酸,全無氣氛,仲衰過平時流行經典50年,好心米(咪)搞落去啦」、「睇到都覺得尷尬,下年咪再搞啦 哈哈」、「好冷清」、「好尷尬,一開頭啲人唔識,出名少少得譚嘉儀」、「屋企人仲多過觀眾席啲歌手」、「全部都係暗星 笑X死我」、「成個頒獎典禮好X肉酸」、「TVB挑戰香港人尷尬極限」及「啲歌星少到」等等。

《2020年度勁歌金曲頒獎典禮》截圖
《2020年度勁歌金曲頒獎典禮》截圖

頒獎典禮變質
昔日嘅《勁歌金曲頒獎典禮》有唔少天王天后出席,甚至連頒獎嘉賓及司儀都係星光熠熠,十分熱鬧,絕對係一年一度嘅城中盛事。不過今時今日嘅《勁歌金曲頒獎典禮》星光不再,絕大部分獎項繼續由英皇及星夢瓜分,司儀陣容亦喺幾年前變革,由鄭丹瑞、鄭裕玲(Do姐)及曾志偉等人變成今屆嘅陸浩明、區永權及許文軒。唔少網民都不禁唏噓留言:「睇今晚勁歌,有點感觸,當年是年度盛事,如今變成雞肋⋯最難受是大台自己都唔重視⋯」、「攞返2000年來比,完全變左(咗)質」、「所以香港樂壇又點會唔死唔衰.....無記頒獎典禮!!!堅係一個大笑話!!!!!!!」、「無大星真係爭好遠,以前勁歌明明好好睇」、「根本零競爭,啲人上台一啲開心都冇」、「真係圍威喂」、「宜家仲垃圾過新城」及「劇集金曲分奬典禮」等等。

《2020年度勁歌金曲頒獎典禮》截圖
《2020年度勁歌金曲頒獎典禮》截圖

最受歡迎男歌星竟然打和
噚晚最多人討論嘅一定係「最受歡迎男歌星」,因為今屆竟然出現「打和」雙冠軍,由胡鴻鈞及周柏豪齊齊奪獎,今次係1983年首次舉辦以嚟第一次出現嘅局面,一班網民就似乎好不滿,因為咁樣就唔係「最」受觀迎,紛紛留言話:「咁都有得打和」、「知唔知個最字點解」、「痴線 最受歡迎男歌星兩個?沒有最白痴只有更白癡」、「最受歡迎又點會有兩個呀」、「兩個獲獎,即無人係最啦。」、「有冇搞錯???點解要同周柏豪share 呀!」、「下次頒10個都得」、「豬肉到頂點」及「真係一個大笑話」等等。

《2020年度勁歌金曲頒獎典禮》截圖
《2020年度勁歌金曲頒獎典禮》截圖

《呼吸有害》全晚最實至名歸
由莫文蔚(Karen)主唱嘅《飛虎之雷霆極戰》主題曲《呼吸有害》深得樂迷喜愛,橫掃四大頒獎禮嘅歌曲大獎,噚晚成功奪得「金曲金獎」。唔少網民都認為呢個獎喺全晚最實至名歸,紛紛留言支持話:「莫文蔚拎金曲金奬實至名歸」、「呼吸有害金曲金係全晚最正常」、「真天后」、「全晚得呢個賽果先至比較合理」及「終於似啲樣」等等。

《2020年度勁歌金曲頒獎典禮》截圖
《2020年度勁歌金曲頒獎典禮》截圖

獎項被批評「太公分豬肉」
今屆《勁歌金曲頒獎典禮》繼續「太公分豬肉」,淨係男女歌星獎已經分開幾個「最受歡迎網絡男/女歌星」、「最佳演繹男/女歌星」和「最受歡迎男/女歌星」。除咗之外,一班出席嘅無綫藝員都有獎拎,例如出爐視帝王浩信憑翻唱鄭伊健嘅《甘心替代你》獲得「人氣王大獎」和「最佳改編歌曲金獎」、袁偉豪獲得「最受歡迎新人獎(銀獎)」及羅天宇、龔嘉欣/謝東閔、戴祖儀憑《逆流直上》獲得「最佳合唱歌曲獎(金獎)」等等,不過最令人費解嘅係早前確診肺炎嘅施匡翹,竟然因禍得福獲得「年度最佳進步獎(銅獎)」。唔少網民睇完成個騷後都紛紛留言:「衰過新城分豬肉」、「勁歌都新城化,愈嚟愈多奇怪獎」、「勁歌千輝頒獎典禮定萬千金曲頒獎典禮」、「人氣王?幾難信服。」、「中招都有個獎」、「施匡翹乜水,確診就成名」、「施匡翹完全冇知乜水..咩歌」、「袁偉豪都叫新人?咁都有臉上台攞!」及「Whatttt??!謝東閔仲係新人?」等等。

《2020年度勁歌金曲頒獎典禮》截圖
《2020年度勁歌金曲頒獎典禮》截圖
《2020年度勁歌金曲頒獎典禮》截圖
《2020年度勁歌金曲頒獎典禮》截圖
《2020年度勁歌金曲頒獎典禮》截圖
《2020年度勁歌金曲頒獎典禮》截圖

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!