【Bookmark定】米芝蓮台中篇 4大古早味小店必食推介

上星期為大家介紹2020台中米芝蓮推介十大台菜（按這裡），不過好多人去旅遊搵好嘢食都鍾意小店，今次就為大家介紹必比登（Bib Gourmand）名單之中入面4間小店，超平價、超簡單、超低調，好多唔係街坊根本都唔會知，想食米芝蓮級數古早味台灣菜又唔想大破慳囊的話，記往以下4間啦！

只開上午古早味麵店：阿坤麵

講古早味又點少得台灣麵，呢間開業70年、位於台中公園附近嘅古早味麵店「阿坤麵」由小販攤演變成店舖，由於鄰近小學，好多人由小學開始食到變阿爺！店內裝潢超簡單，而且全店只賣一種麵，完全無得揀，一入店就見老闆整好一排排大碗麵，食客拎咗就坐低慢慢食，極具效率。店內「阿坤麵」就係簡單嘅油麵加上豆芽，淋上香濃滷水汁，非常開胃，而且只賣35台幣！雖然得一種麵，不過另有魚丸湯都係備受好評，而且每日只做早市及午市。一碗麵加一款湯，賣足70年，可見其實力超群！

阿坤麵店

地址：台中市中區平等街142號

營業時間：6AM至1PM（星期六、日至12NN）

開業半世紀肉粥：台客燒肉粥

去食「台客燒肉粥」簡直可以話等同參觀景點一樣，因為全店佈置仿如古時客棧一樣，極度古色古香，用上紅磚同瓦加上室內大量木枱木櫈，連餐具等都用上花布花碗。至於食物方面，招牌名菜當然係燒肉粥，35台幣一個小碗，入面卻有極多材料，包括肉條、蔥油、筍、油炸鬼等，配合綿綿粥底一齊食，味道非常夾！另外仲有多款台中傳統菜式包括燒肉香腸拼盤、香酥炸排骨、溏心蛋等，全部都係睇落簡單但卻帶有濃濃古早味，絕對係美食及觀光嘅最佳體驗！

台客燒肉粥

地址：台中市南屯區五權西路二段722-1號

營業時間：5PM至1AM（逢星期一休息）

火鍋宵夜台灣牛肉：尚牛二館

火鍋迷當然同時係牛肉迷，呢間「尚牛二館」就滿足到大家。全店採用即日直送嘅台灣本地溫體牛（即完全未曾雪過），來自雲林牧場嘅新鮮牛肉，所以「一館」就位於雲林，台中呢間就係「二館」。可以點牛肉拼盤就可以食到各種部位，店主推介每片 牛肉只淥3秒就可以，最多5秒內一定要離開水面，保持牛肉鮮嫩，可以咁有信心全因為牛肉全部無灌水，唔會出現泡泡，食落鮮甜而不油膩。除咗火鍋之外，另有現煮牛肉湯、牛肉燉飯、台式牛肉麵等，就算唔想打邊爐一樣可以品嘗新鮮台灣牛！

尚牛二館

地址：台中市北區民權路470號

營業時間：5PM至2AM

三代傳承豬排麵：上海未名麵點

「一間舖頭養三代」大家都聽得多，仲要好味到拎埋米芝蓮就真係抵讚！呢間「上海未名麵點」創辦人目前已經97歲，由上海移民台中之後開店，傳承至今已經係第三代人主理。小店主打兩款麵，就係豬排麵及牛肉麵，其中豬排麵最受歡迎，炸得外脆內軟，配以四川新抱秘製擔擔麵底，而且唔混花生碎改用芝麻醬，味道非常獨特，僅此一家，每碗只賣85台幣。除咗麵食，店內自家製辣醬都大大加分，用上8種中藥材料例如八角、花椒等煉成，令麵食味道即時提升！小店一向只做早、午市，自從米芝蓮消息公佈咗之後，小店隨即大排長龍，下午1點就已經沽清豬排及牛肉麵，厲害！

上海未名麵點

地址：台中市中區市府路69號

營業時間：7AM至1:30PM（逢星期日休息）