10套宮崎駿執導的吉卜力工作室長篇動畫

近排吉卜力工作室喺網上搞咗個人氣總選，叫Fans喺21部長編動畫揀出至愛，暫時8月13-20日中間結果，票數最高5位分別係《風之谷》、《天空之城》、《魔女宅急便》、《幽靈公主》及《千與千尋》，呢5套嘅共通點就係佢哋都係由宮崎駿執導。其實21套入面有10套都係宮崎駿執導嘅長篇動畫，睇吓大家係咪都睇過哂：

1. 《風之谷》（1984）

雖然《風之谷》上映之後吉卜力工作室先成立，不過版權都係歸於吉卜力工作室名下。動畫《風之谷》改編自宮崎駿同名漫畫，講述世界因為一場「火之七日」嘅戰爭而變得滿目瘡痍，被會釋放瘴氣嘅腐海森林同巨型昆蟲包圍。當中有一個國家「風之谷」受海風保護而不受污染，但有一日卻不幸被捲入戰爭之中，於是公主娜烏西卡為咗化解戰爭同搵出腐海昆蟲騷動嘅不因展開旅程。

呢套動畫當時非常大買，而故事背後隱含住宮崎駿對於環境保育同反戰嘅思想，各個人物都隱含住對真實社會嘅投射，因而令宮崎駿獲得無數獎項，亦自此建立作品關注人與自然嘅風格，亦打開知名度。

2.《天空之城》（1986）

1986年嘅《天空之城》再次展現宮崎駿重視人類與自然嘅關係、和平主義及女權運動嘅思想。故事講述傳說有人類試過用高科技創造咗可以喺天空中飛行嘅城市──拉普達。有一日反派麥瑞勤指示身手搶奪一名叫茜黛嘅少女身上一個與天空之城有關嘅「飛行石」，茜黛逃走時認識一位少年栢斯，為咗阻止麥瑞勤嘅企圖而展開咗尋找傳說中嘅天空之城拉普達之旅。

《天空之城》中男女主角孤兒嘅背景唔多唔少都暗示戰爭導致家破人亡嘅禍害，而入面啲軍人好似豬咁蠢亦反諷戰爭嘅愚昧；女主因為槍擊而失去髮辮，但卻變得堅強，勇於對抗敵人不再柔弱，滲入女權主義；而結局最終發現人類沒有土地都係生存唔到，再次強調人同自然無法分割。如此傑出嘅作品，當然獲得不少獎項，更加成為香港人首套票房過千萬（港元）嘅動畫片。

3.《龍貓》（1988）

宮崎駿另一個重視嘅思想就係孩童嘅赤子之心，當中最經典一定不能不提1988年上映嘅《龍貓》。故事講一個大學教授同佢兩個女兒草子同次子搬咗去鄉間住，而教授老婆就因為患咗肺結核病喺附近嘅醫院休養。而草子同次子成日都可以發現到新奇事物，好似有「煤炭屎鬼」同「小龍貓」，最終仲結識到森林嘅守護者「龍貓」。其實唔難估「龍貓」背後嘅隱喻就係童真，因為佢只可以畀小朋友見到。而《龍貓》亦為宮崎駿打開世界知名度，連吉卜力工作室都以「龍貓」做logo。

4.《魔女宅急便》（1989）

除咗童真，宮崎駿亦擅於講成長同夢想，《魔女宅急便》就係其中嘅代表。主角琪琪係一個13歲嘅實習魔女，依照傳統佢係時候要離開屋企，去另一個城市展開新生活。琪琪起初無法適應到新城市嘅生活，後來開咗間速遞公司維生，但成日出錯令琪琪失去自信⋯⋯

睇緊故事都知，其實宮崎駿就係講緊青少年由兒童過渡到成人嘅迷惘時間，人人都必須要成長，而成長亦都要付出代價，好似最後琪琪恢復魔法，但就唔可以再同佢隻貓吉吉溝通。到底成長嘅過程中可唔可以勿忘初心呢？答案話唔到你知，但就可以話畀你知《魔女宅急便》絕對取得巨大成功，成為日本1989年票房最高嘅電影。

5.《飛天紅豬俠》（1992）

宮崎駿話過《飛天紅豬俠》其實係佢嘅半自傳，隱含住佢對人到中年嘅睇法。故事講一個因魔法而變成豬嘅飛行員阿Lam與反派「曼馬由特空中海賊團」同空中海賊團聯盟嘅對抗，當中還得到兩個紅顏知己幫助。動畫中多次提到法西斯，主角寧願變成豬，都唔肯與法西斯主義為伍，好明顯帶有強烈反戰主義。而兩個女人嘅存在或者都唔係中年男人想要邊種女人咁簡單，其實背後可能講緊兩種人生方向，到底要settle down定係繼續堅持理想呢？（小編自己估架咋，各人有各人睇法呀）呢套動畫亦不意外地成為當年排行第1嘅電影，甚至被英國《Time Out》評列為前50大動畫第30名。

6.《幽靈公主》（1997）

《幽靈公主》中男主角飛鳥，為咗幫村莊解除詛咒而去西方，中途既識到麒麟森林中由犬神撫養大嘅「幽靈公主」珊珊，又認識到工業之城嘅統治者幻姬。幻姬統領嘅係一班窮人，為咗對抗封建貴族唯有從開採森林資源製造武器，但破壞大自然嘅舉動卻惹起「幽靈公主」嘅反抗，飛鳥唯有嘗試調停雙方⋯⋯

《幽靈公主》既有濃重環境保護意識，亦顯示出女權主義，例如女總督幻姬為咗保護城鎮所有人，表現出幹練勇敢嘅魄力，城入面更加幾乎女人更勝一籌，當女人死守家園嘅時候，一班男人就有如廢物般，不同於日本傳統中女人係男人附屬品嘅觀念。《幽靈公主》唔單止喺日本得到高評價，甚至美國多數影評人都給予正面評價。

7.《千與千尋》（2001）

獲得2002年第52屆柏林影展金熊獎、第75屆奧斯卡最佳動畫片獎等多個國際大獎嘅《千與千尋》，至今仍然係日本歷史上最賣座嘅影片。故事雖然大家都熟悉，但循例都要講吓。《千與千尋》講嘅就係得10歲嘅千尋，因為同父母誤闖一個靈異小鎮，而父母更因為未經許可下亂食嘢而變成豬，千尋唯有留喺呢個地方尋找解救父母嘅方法。呢套動畫，深入地談到人性、成長、愛、親情等多樣人生哲理，當中多個隱喻、象徵係唔同時間睇都有唔同體會，小編都唔知點樣去一一分享自己對每個情節、人物性格嘅睇法，故呢套動畫真係不得不成為宮崎駿作品入面經典中嘅經典，真係值得一睇再睇。（講講吓，小編又想睇多次）

8.《哈爾移動城堡》（2004）

宮崎駿作品很少會對愛情著墨，就算有都係比較若有似無，總之唔會係重點，但2004年嘅《哈爾移動城堡》竟然罕有地重點談及愛情。故事背景設定喺19世紀嘅歐洲世界，出現咗一座會移動嘅城堡。一個普通少女蘇菲被軍官搭訕，突然靚仔嘅哈爾出現救咗佢，但卻惹起荒野女巫嘅不滿，將蘇菲變成90歲嘅婆婆。變老嘅蘇菲離家出走，誤打誤闖就去咗哈爾嘅移動城堡做清潔工⋯⋯

難得講愛情（雖然當中都有講反戰），估唔到宮崎駿都handle到喎。蘇菲雖然愛上哈爾，但係哈爾英俊嘅外表令平凡嘅佢覺得自卑；雖然金髮哈爾一副不羈嘅樣子，但其實內心好孤獨，亦都好膽小。然後蘇菲慢慢變得自信，儘管哈爾唔畀佢打掃城堡最髒亂嘅地方（其實即係哈爾內心），勇敢地主動走近哈爾；哈爾慢慢受到感化，由金髮變成黑髮，唔再用外表武裝自己，由小男孩變成男人。其實簡單啲，就係一個女孩與一個男孩相遇，漸漸改變內心世界，互相接納同拯救對方嘅故事。或者小編其實係睇錯重點，但無論點樣佢哋互相試探到打開心窗嘅過程，實在令人為之動容。

9. 《崖上的波兒》（2008）

呢套動畫上映嗰陣，成日都聽到周街都有人唱「波兒波兒波兒魚兒小寶貝」，loop嘅程度同let it go有得fight。故事講大海中一隻小金魚偷偷離開屋企，想睇吓外面嘅世界係點，點知唔小心卡咗喺個玻璃罐到。呢個時候，有個叫宗介嘅男仔救咗佢，仲幫佢改咗個名叫波兒。而波兒鍾意咗宗介，所以想變成人類⋯⋯

雖然表面上好似係一個愛情故事，但其實中心思想始終都離唔開人與自然嘅關係，波兒代表嘅係大自然，動畫中不時見到海洋垃圾代表住人類對大自然嘅破壞，最終差點釀成嘅大海嘯，或者都係宮崎駿想帶畀大家嘅一個警示。

10.《風起了》（2013）

《風起了》男主角堀越二郎細細個就好想設計飛機，大個終於成為航空工業嘅精英，更與曾火車上邂逅嘅女仔菜穗子重逢並結婚。菜穗子後來患上肺結核，但卻一直支持男主追尋夢想。不過，男主研發嘅卻係用嚟殺人嘅戰鬥機……呢套動畫上映時候評價不一，因為女主竟然病死，又涉及軍國主義同美化零式戰機設計者，似乎變得「成人向」，日本有人罵佢係國家叛徒， 亦有部分韓國民眾不滿，不過仍然成為2013年日本最賣座嘅本土電影。

圖片來源：《風之谷》海報、《天空之城》海報、《龍貓》海報、《魔女宅急便》海報、《飛天紅豬俠》海報、《幽靈公主》海報、《千與千尋》海報、《哈爾移動城堡》海報、《崖上的波兒》海報、《風起了》海報