150cm 女孩的自白

我是一個身高只有150公分的女孩。

由細到大，我都好習慣人地笑我矮、細粒或者腳短。雖然好好彩因為細粒，大家都當我年年廿二，但背後有幾苦真係得自己知。

第一樣要講既，一定係搭車！！！！！有返咁上下高嘅你地一定無諗過，腳短嘅人如果貼晒椅背咁坐直，係會吊‧腳，全程車瞓唔到。想瞓咩？就要跣低啲坐，但代價係搭足一粒鐘車之後條腰會超痺。一個禮拜返工放工坐足十次，到咗Weekend條腰真係酸痛到想攤喺床一日都唔出街。仲有搭小巴，可免則免都唔會揀最後面個排坐，因為尾二嗰排凳係零舍高，司機喺倒後鏡睇唔到矮過前排椅背嘅我，次次都大大聲問：「最後個排有無人坐呀？」，成車人都聽到，好鬼老尷……

跟住就係買衫。人細粒，即係無論身長、腳長、腳板、膊頭、手指等等你諗得出嘅，乜都短過人幼過人。每次買衫都要揀最細嘅碼，而女裝XS同S係成日都斷貨。最慘係就算有細碼都唔一定啱身：大型連鎖服裝店多數就外國人身形，細極都無我碼；著親大褸，睇落就好似小朋友扮大人咁；鞋睇啱女裝款但又太大，只可以買童裝；買褲永遠都要改短；戒指要特別訂造……諸如此類。我衣櫃入面就儲咗好多買嗰陣諗住無死，返到屋企都係覺得太過Oversized所以唔敢著嘅衫……

再講拍拖。其實150cm呢個高度，無論對方有幾高，基本上拖手、搭車挨住瞓等等都好舒服，我最鍾意面對面雙手環抱佢條腰、個頭啱啱好喺佢鎖骨位置、額頭貼住佢條頸嗰種感覺。試過有位前度係差唔多180cm，所有人知道我地一齊之後嘅即時反應都係：「咁你地點Kiss架？？？？」嗯其實又唔係咁難估姐，咪搵啲樓梯呀、扶手梯咁囉。試過有一次佢好激動咁企喺到攬住我，但30cm嘅身高距離令佢無意中將成個人嘅重量壓咗落我到，我一時失平衡仆咗落地，成街嘅人都望住佢以為佢打女人……呢件事，比啲朋友恥笑咗幾年都仲無限回帶緊。

仲有未講迫地鐵唔夠高爭取上層新鮮空氣好易暈、去超市永遠攞唔到最上層嘅貨等等……總之��係你諗得出諗唔出嘅各種難題都會遇到。做個150cm小矮人真係唔容易架 :’(

************************************

（原文刊於Yahoo Style HK）

Facebook專頁： b612lpp

Instagram：b612lpp

Tumblr：b612lpp

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」