185貞子洪助昇嚇到師弟面容扭曲呆足兩個鐘 受害人Eric@Locksmiths：我係咪真係撞邪？

萬聖節就到，為了應節，「貪玩之鬼」洪助昇（Aiden）決定「作惡」一番，目標人物是樂隊「Locksmiths開鎖佬」。為了令整蠱計劃達到理想效果，Aiden事先約了Locksmiths的Bass手Harry食tea收風，得知隊中最細膽的是Keyboard手Eric後便着手行動。Aiden預先弄壞Locksmiths band房的燈，隊員約Eric到band房，當Eric回到空無一人的band房打開門及開燈時，便播出粵曲，再走進內時，Aiden所扮演的貞子便驚嚇衝出。

事發當日，Harry約好Eric，Eric首先到達band房，開門後便開燈，但按了多次仍只得一盞燈通電，按多幾次燈掣後，band房內便響起粵曲，Eric呆了幾秒，再次開關燈掣後，便將手上袋子放在下，同步發短訊向隊友求救，「我開咗門之後有音樂囉。」粵曲聲再次響起，馬上關門走人。

躲在band房一角的Aiden無奈說：「都未嚇到佢就已經走咗。」為了完成整蠱計劃，有份被Eric求救的Locksmiths成員及經理人都力勸他再上band房，由另一幫兇鼓手Tom陪同。為了令靈異效果更加迫真，Aiden趁二人還未到達，立即將band房弄得凌亂不堪。當二人再次上去，這次Eric手上多了一支長掃把，Eric打開門後繼續前進，終於望到「貞子」所在位置，「貞子」驚嚇衝出，嚇得Eric面容扭曲兼擘大口大叫，隊員及Aiden隨即大笑，Eric軟攤在地上，對大家的「慰問」已毫無反應，整蠱計劃大成功。

事後受害者Eric表示當聽到粵曲時便怯起上來，「起晒雞皮！心諗：『唔係呀嘛！咁邪！』之後搵Tom陪我上去，見到枱同地下亂七八糟以為有賊入屋，擸架撐行入去，然後見到主音大雄個位竟然有個長髮、白色長裙嘅⋯⋯ 人，唔知係唔係人喺度，就俾佢嚇親開始大叫！跟住勁腳震，我心諗：『跪喺度啦，應該就係prank嚟㗎啦。』嗰個位真係會怯，仲諗到好遠，『點解上一手個租客會轉租？點解會搬走？點解出面咁多嗰啲神主枱？』已經諗到好deep，諗緊我係咪真係撞邪。」而陪同Eric的幫兇之一Tom坦言有點內疚，「因為我見佢真係神情呆滯，坐咗喺地下粒聲唔出，呆咗兩個鐘先回神，我心諗：『死啦，會唔會真係嚇到傻咗呢？』但好彩後尾我哋夾band嘅時候佢都冇乜嘢，但我就有少少內疚，因為可能佢真係好細膽，不過係唔會放過佢，哈哈。」

至於主謀Aiden則表示因為自己每年萬聖節都會被嚇，今年決定主動出擊。這次選中Locksmiths為目標主要是因為之前大家合作過，不過原來最初擬定主音大雄為受害者，但後來覺得他太醍目，所以轉移目標，找來比較單純的Eric。Aiden解說這次原本Eric不需要承受這麼多的驚嚇，但計劃趕不上變化，「如果佢第一次再行入啲，我已經嚇到佢，不過佢走咗，所以第二次返嚟嘅時候，件事會變得更加恐怖。」他又分享這次扮貞子的辛酸，「匿喺band房戴住個長假髮真係好熱，又睇唔到嘢，又熄晒燈，其實都幾恐怖。再加上見到佢第二次上嚟，手上面揸住碌棍，幾驚佢驚得滯會『毆』落嚟，哈哈。」影片播出後，有網民留言「呢隻貞子伙食唔錯」，Aiden開心表示大家反應很好，對於自己是「世界上最大份」的貞子，他說：「成為世界上最大份嘅貞子都係一個榮幸，好開心大家睇得好開心，希望大家萬聖節快樂。」最後更向受害者挑機：「希望佢哋會整蠱返我，好期待。」