3對女星傳不和 一張相話畀全世界知：我哋好好

近排鄭秀文（Sammi）開演唱會雖然失聲，但係依然獲不少歌迷同好友力撐，當中最令人難忘就梗係Sammi同楊千嬅都喺自己嘅社交網站上傳二人合照啦，兩個人傳不和咁多年，一張圖就解釋哂。其實唔少女星都成日被人傳不和，正所謂有理說不清，以下3對女星就一於懶理，直接用張相就解釋哂：

鄭秀文 楊千嬅

Sammi同楊千嬅傳不和傳咗廿幾年，有傳楊千嬅出道時因為被指個樣似Sammi，而公司都有意打造佢做翻版鄭秀文，於是引起Sammi不滿。加上初出道時走嘅路線差唔多，傳媒於是成日將兩個人比較，因此傳出兩人不和，拒絕出席同一個場合活動。

不過，兩人一直就懶理傳聞。去年楊千嬅搞演唱會就已經請到Sammi做嘉賓，再喺台上攞兩個人撞樣一事講笑。千嬅話試過畀人誤認做Sammi，對住佢講「我好喜歡你跟華仔拍的幾部戲！」；Sammi都話有人試過叫佢做「丁太太」，識講笑即係無不和啦？今次Sammi演唱會，大家仲直情上傳合照，Sammi更喺自己IG直接表明：「唔該唔好再話我哋不和，唔like 對方喇！呢d新聞太out 太老土喇！兩個潮州師奶彼此好明白潮州女人的脆弱與堅強。」用一張相就解釋哂啦。（其實小編覺得兩個人真係唔似樣，而且好明顯走嘅路線都唔同⋯⋯）

楊怡 胡定欣

仲記唔記得早幾年《萬千星輝頒獎典禮》楊怡被人捕捉到似乎係「藐」緊坐佢隔離嘅胡定欣，滿臉不屑咁扭轉頭，反而對住徐子珊笑笑口傾計，引起雙方Fans罵戰。其實佢兩個不和傳咗好耐，話說當年拍《大唐雙龍傳》兩人本身好好姊妹，點知因為爭吳卓羲而反面；加上胡定欣同馬國明分手，作為馬明好友嘅楊怡不值其所為而不和。

傳就咁傳啦，之但係楊怡同羅仲謙下月擺酒，楊怡有派帖畀胡定欣。胡定欣仲影低張帖放上社交網站，公開祝福楊怡，仲話諗起十幾年前同楊怡沙灘玩水嘅情景。睇嚟佢哋無大家想像中咁不合？其實兩個人都係先後拎過「飛躍」、「女配角」兩個獎，一步一步由普通角色捱到「視后」，可能經歷過差唔多嘅辛酸，反而更明白對方呢？

劉嘉玲 張曼玉

劉嘉玲同張曼玉一直被指為梁朝偉嘅紅白玫瑰，雖然劉嘉玲同偉仔相戀多年，兼且結埋婚，但係銀幕上張曼玉同梁朝偉就係經典情侶，合作過多套著名電影包括《花樣年華》、《英雄》等，現實中似乎係紅顏知己嘅角色。而最經典就係2000年偉仔同時拖住兩位女神出席坎城影展，而從此兩位女神就再無同場出現，呢段三角關係撲朔迷離，因而有傳兩位女神不和。

不過，兩位巨星有咩風浪未見過？傳不和傳咗十幾年，兩人都一直懶理。直至2013年，劉嘉玲喺微博上傳兩人合照，一句「歲月極美」就打破不和傳言。其實，人哋嘅感情事人哋最清楚，觀眾都係唔好FF太多，成日幻想人哋不和啦。

圖片來源：楊千嬅＠Facebook、鄭秀文＠Instagram、胡定欣＠Instagram、TVB.com、劉嘉玲＠微博