34歲獨子仍靠老豆找卡數 黎彼得任勞任怨︰得一個仔冇得揀

73歲嘅TVB綠葉演員兼填詞人黎彼得，去年因為入院做「通波仔」手術後被TVB飛出《愛．回家之開心速遞》。手停口停之下，黎彼得經濟拮据，但係富商劉鑾雄主動資助Peter哥手術費及生活費，加上契仔黃宗澤（Bosco）等人亦出手幫忙，協助佢度過難關。

早前黎彼得接受傳媒專訪，透露大劉已經停止資助佢嘅生活，但Peter哥依然心存感激，仲話當日大劉俾佢嘅錢多於佢一年生活費。雖然財政問題暫時緩解，但Peter哥原來仲要供養今年34歲嘅兒子。

黎彼得本來唔打算成家立室，但39歲時因肝病被送入ICU，因此決定同當時女友結婚，婚後二人育有一子。但喺阿仔3歲時，前妻決定離開，之後Peter哥一個人帶住個仔。由於要搵錢獨力撫養兒子，Peter哥工作繁忙，唔少時間都係由菲傭照顧個仔。即使黎彼得自言愛錫個仔，但認為自己經常唔喺屋企影響阿仔成長，父子關係麻麻，平時鮮有溝通。

而家Peter哥個仔喺內地攻讀中醫課程，掉返轉係由老豆「俾家用」個仔，甚至為阿仔找卡數。喺父子間少數嘅短訊溝通，內容都係講金錢往來。黎彼得向傳媒解釋，因為近三年有疫情令個仔好難喺內地搵工，先至要老豆出手。一直為未能陪兒子成長而內疚嘅黎彼得，表明希望財政上照顧好個仔先至百年歸老。至於會否希望阿仔自食其力，Peter哥直言唔理得咁多，亦唔否認太疼錫個仔，因為得一個仔冇得揀。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！