4個令人驚嘆的男扮女裝明星

袁偉豪（Benjamin）近日無啦啦post咗張男扮女裝嘅相，都幾重口味下⋯⋯原來呢個係佢新劇《三個女人一個「因」》嘅其中一個造型，其實歷年嚟香港男星都成日會為拍劇男扮女裝，以下係小編私心想推介扮女人扮得惟妙惟肖嘅4位男神：

1. 陳鍵鋒 《王老虎搶親》

青靚白淨嘅陳鍵鋒成日都畀人話似女仔，仲有人話佢同龔嘉欣好似。終於，佢喺《王老虎搶親》為咗親近胡定欣，所以男扮女裝。嘩，佢扮相真係仲靚過胡定欣，加埋佢笑起嚟仲有「酒凹」，唔怪得嗰陣好多人都讚佢係「周美人」啦。

2. 羅嘉良 《先生貴性》

講到tvb男扮女裝嘅劇集，一定唔可以唔提羅嘉良喺《先生貴性》做嘅Diana。套劇講羅嘉良被陳慧珊上身，被迫著女裝以Diana嘅身份幫佢搵出兇手。雖然「撈家」扮得唔算靚，但最緊要演技搭夠，佢一舉一動真係令我以為佢就係Diana而唔係鄧炳權（羅嘉良飾演嘅角色）。套劇都好好睇，結局睇到我幾緊張，仲有首好好聽嘅歌：誰共誰一起⋯⋯

3. 余文樂《春嬌與志明》

「別問我是誰 請與我相戀～」2012年《春嬌與志明》男主角余文樂喺片尾反串王馨平，大家唔會唔記得掛？雖然Fisherman Lok陽剛味都幾重，但勝在佢好用心咁扮王馨平嘅動作同表情，其實有幾下都幾嫵媚，小眼神都幾誘惑下架。

4. 張國榮 《霸王別姬》

要數到最經典男扮女裝，可以仲靚過女人多多聲嘅，哥哥張國榮就係最佳代表。哥哥喺《霸王別姬》 入面虞姬嘅扮相，簡直要用「回眸一笑百媚生」、「傾國傾城」去形容，一顰一笑都散發出不可抗拒嘅魅力。佢嘅美真係超越咗性別，就算離開咗我哋13 年，都唔會唔記得您飾演嘅程蝶衣。

圖片來源：袁偉豪微博、TVB.com、劇集《先生貴性》、Media Asia 寰亞＠Youtube、電影《霸王別姬》