5位出道唔夠兩年就可以喺紅館開個唱嘅歌手

坤哥吳業坤正式出道一年就可以喺紅館開演唱會，門票昨日正式公開發售，但係銷情就⋯⋯其實可以喺紅館開concert係好多歌手嘅夢想，因為香港以前一直有唔少殿堂級歌手好似許冠傑、梅艷芳、徐小鳳、張國榮都喺到開唱唱會，所以可以喺紅館開show被視為實力嘅表現。

其實，2000年開始就有唔少出道無耐就可以喺紅館開concert嘅歌手，一齊回顧5位仲係樂壇新人就開紅館個人演唱會嘅歌手：

1. 衛蘭－2年

黎明捧得嘅歌手，未出道先聽聲不見樣是常識吧？當時A Music直接將衛蘭翻唱黎明嘅金曲派台，嗰陣未見樣先聽聲，已經覺得衛蘭把聲好靚，鬼鬼哋嘅口音更加特別。2005年衛蘭正式公開容貌並發佈第一張個人大碟，當時佢喺各大頒獎禮拎哂所有女新手獎，仲係首位出道不足一年便入選叱吒我最喜愛女歌手最後五強，07年就喺紅館開佢第一個1連4場嘅個唱。衛蘭啲歌真係好好聽，《心亂如麻》、 《離家出走》、《就算世界無童話》等等歌曲，到宜家去唱K都係必點，好期待咁有實力嘅衛蘭可以重新成為香港一線歌手。

2. 林峯－2年

一直主力拍劇嘅演員林峯，自從唱咗《歲月風雲》插曲《愛在記憶中找你》，開始被人留意佢唱歌嘅天分。2007年正式簽約英皇，第一隻專輯令佢成為該年度唱片銷量最高的樂壇新人，林峯唔少專輯出咗一陣就輕鬆衝破白金唱片銷量，喺市場上少有唔使點宣傳已經賣到碟嘅歌手。09年開咗第一個紅館演唱會，之後佢更5年四度喺紅館個開個唱，打破自2000年歌手喺紅館連開個唱紀錄。林峯《愛不疚》、《如果時間來到》、《幼稚完》等等經典作品真係好好聽，能夠歌影視三棲其實好犀利。

3. 容祖兒－1年多

香港樂壇天后容祖兒，1999年一出道憑一首《未知》打響名堂，第一隻EP《未知》銷量達到13萬張，破紀錄成為首位樂壇新秀連續停留IFPI榜23個星期，到目前為止仍未有新人能夠打破。一年多後喺紅館開咗第一個個唱，同年已經得到女歌手獎項，自此走上樂壇天后嘅道路。截至2016年，Joey係全球奪得最多獎項嘅藝人，出道17年已經拎咗超過千個獎項，係叱吒史上唯一一位女歌手十次奪得「叱吒樂壇女歌手金獎」，至今已經喺紅館開咗7個個唱，並且經常要加場。Joey多首歌曲《痛愛》、《隆重登場》、《16號愛人》、《連續劇》幾乎人人都識唱，天后實力無庸置疑。

4. Twins－1年

香港女子組合Twins一出道以一個側手翻受到大眾喜愛，自此開始大紅大紫。雖然佢哋嘅唱功經常被人批評，但當時陽光可愛嘅形象，加上多首琅琅上口嘅歌曲《明愛暗戀補習社》、《女校男生》、《戀愛大過天》、《風箏與風》等，令佢哋迅速成為最受歡迎組合。所以，出道一年就可以喺紅館舉行演唱會，亦係第一對華人女子組合喺紅館同歐美開個唱，更加做到歌影視三棲。出道15年，雖然中間有過唔少低潮，但Twins嘅歌陪住一代香港人成長，已經成為集體回憶嘅一部分。

5. 側田－8個月

側田出道8個月就喺紅館開個唱，雖然當時佢只有一隻得十首歌嘅個人專輯，但係其演唱會飛開售後十分鐘已經賣哂，更加要加開兩唱，喺由出道到可以喺紅館開演唱會歷時最短嘅香港歌手。側田雖然唔算靚仔又唔算高，但係佢又識作歌，唱功更加係一流，側田嘅代表作《好人》同《命硬》更加係首推。佢至今喺紅館開咗六個個唱，但因為不時有負面新聞而人氣下滑，希望嚟緊佢可以再次推出精采作品，重回一線歌手位置。

圖片來源：tickethk.com、城市售票網、容祖兒Facebook、Twins Facebook