52歲張敏現身內地網紅帶貨直播 網民竟然認唔出?
現時52歲嘅張敏,1985年亞視藝員訓練班出身,曾拍攝多套經典電影,憑《賭聖》中飾演「綺夢」一角令人印象深刻,成為90年代電影圈嘅當紅女星,女神形象深入民心。後來張敏減少接戲做生意,雖然一早已經淡出娛樂圈,不過佢活躍於社交網站,不時上載相片同網民分享近況。
近日張敏驚喜現身於內地網紅許華嘅帶貨直播,引起網民熱烈討論。直播中張敏身穿黑色外套配黑色圍巾再加條黑色皮褲,而妝容方面,張敏擦上鮮豔大紅唇再紮條馬尾,十分有型。有網民發現喺直播中嘅張敏冇修圖,不過個樣就同以前唔同咗,仲話唔認得佢添呀!不過亦有網民幫佢解釋話可能係個妝變咗,網民大讚張敏皮膚保養得非常好,年過半百仍然咁白皙,仲希望佢可以回歸大螢幕,拍多啲作品俾大家欣賞。