6位憑一套劇就紅遍韓國的中台影星

雖然韓流來勢洶洶，但近年都有唔少中日台劇集紅返去韓國，連帶劇中主角都紅埋一份，甚至會有韓國電視台買版權翻拍韓版添！下月播出嘅韓劇《月亮的戀人－步步驚心：麗》就係改編自內地劇《步步驚心》，搵嚟IU、李準基、姜河那、EXO伯賢及南柱赫超強卡司，睇嚟對劇本有好大信心呢！

不如就睇吓近年劇集紅到韓國都翻拍嘅6位人氣明星：

《步步驚心》 劉詩詩＋吳奇隆

2011年內地劇《步步驚心》紅遍亞洲，更於第7屆首爾國際電視節年度奪得最受歡迎外國電視影集，嚟緊仲會播出翻拍嘅韓版添。劉詩詩飾演嘅「若曦」同吳奇隆飾演嘅「四爺」亦大受歡迎，當時韓國Fans仲想佢哋呢pair情侶檔上韓國人氣綜藝《我們結婚吧》。自此佢兩公婆就打開韓國市場，吳奇隆連續兩年奪得韓國觀眾投票最高人氣獎，而劉詩詩不但獲韓國觀光公社邀請出任韓國旅遊宣傳大使，又喺第19屆韓國釜山國際電影節得到「亞洲之星」獎，其後佢其他作品亦喺韓國大受歡迎呢！

《我可能不會愛你》 林依晨＋陳柏霖

憑住《我可能不會愛你》入面嘅「又青姐」同「大仁哥」，林依晨同陳柏霖打開亞洲知名度。劇集喺韓國獲得極高人氣，並喺第10屆首爾電視節獎頒獎典禮被觀眾票選為10年來最受歡迎的戲劇，更被改編為韓劇《愛你的時間，7000天》，林依晨同陳柏霖亦因此獲頒「亞洲明星大獎」。陳柏霖之後不但獲邀客串韓劇《Monster》，又同女版「程又青」河智苑合拍韓國電影《致命戀愛》，並先後同韓國女星孫藝珍、宋智孝合作，成功進軍韓國。

《琅琊榜》胡歌＋王凱

雖然《琅琊榜》喺香港收視麻麻，但喺中日台韓就大受歡迎。《瑯琊榜》喺韓國播出之後，多間電視台都想得到韓版翻拍權，而韓國電影劇想返睇要畀錢，《瑯琊榜》成為購買劇集前十名外國電視劇，更有韓國旅行社搞《琅琊榜》主題旅遊。「梅長蘇」胡歌同「靖王」王凱喺韓國嘅人氣亦急升，好似韓國大勢樂隊CNBLUE隊長鄭容和都特登同王凱影相集郵。

圖片來源：電視劇《月亮的戀人－步步驚心：麗》官方Facebook、電視劇《步步驚心》官方微博、電視劇《我可能不會愛你》官方Facebook、SBS.com、電視劇《琅琊榜》官方微博