70歲李國麟直接飲用內地溫泉水 被網民指博到盡：辛苦錢唔係咁易賺

現年70歲嘅李國麟近年長駐內地發展，更曾指自己為咗22歲女兒李沅薐每年英國讀書費用而積極搵銀，而佢的確相當博命，試過喪食小龍蝦、賣衛生巾及安全褲，更連續直播帶貨8小時，但礙於無人落單而被封「最慘帶貨明星」。近日，李國麟又拍片分享到福安和江西等唔同地方嘅旅遊體驗，其中更到訪江西省宜春市溫湯鎮，不過佢於鏡頭前直接飲用溫泉水嘅行為就惹起熱議，網民更指佢搏到盡。

李國麟於片中表示溫湯鎮有一個好古老嘅泉眼，由宋朝存在到而家，其溫泉水平均都係68至72度，更指因為溫泉水可直接飲用，當地居民都會拿溫泉水回家，而佢亦已自備木桶工具；之後，李國麟就直接飲用，更大讚溫泉水水質：「甜甜的」。此行為遭網民討論，指李國麟博盡全力：「辛苦錢唔係咁易賺」、「非常之拼搏，做帶貨沒有人落單」、「邊泡邊喝，帶根吸管」、「努力搵錢供個女係英國讀書」、「好等錢洗？」、「真係可憐天下父母心」等等，不過都有自稱居住於宜春市嘅網民留言：「李老師說的太對啦～我們本地人也常去溫湯打水喝，還可以在溫湯體驗一下泡腳文化哦」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！