90年代艷星鄭艷麗再度入院 月初發文曾表示「唔知撐得幾耐」

九十年代拍過多部三級片嘅女星鄭艷麗，近年身體麻麻，更多次進出ICU，不時喺facebook上載住院照片，令人擔憂。而鄭艷麗今個月初出過post，透露再次進出醫院，「日日都要咁痛苦地渡過，我唔知我可以撐得幾耐」。早兩日佢再次post出住院照片，見到打點滴及監測心跳血壓嘅儀器，仲話「我要幾時先可以出院啊？已經住咗好耐」。唔少網民都留言祝鄭艷麗早日康復。

2020年6月，鄭艷麗因體內鉀水平過低入院一度入住ICU，仲因為病情反覆要進出醫院，當時佢話係因為厭食症所引起。而之前鄭艷麗出院後曾經出post感謝醫護人員「再一次搶救我的生命」，佢都提過差唔多每年都要入院一次，似乎身體狀況仍需調理。去年8月﹐鄭艷麗再次因病入院，而且又係要入ICU，幸好最後冇事。

鄭艷麗1988年參加TVB《銀河接力大賽》而入行，曾經係大台力捧小花，仲拍過梁朝偉主演嘅劇集《俠客行》。後來三級片盛行，外表清秀嘅鄭艷麗亦都加入性感女星行列。鄭艷麗之後認識鍾意結交女星嘅台灣富商黃任中，仲成為黃嘅契女。後來黃任中患病，身邊美女四散，鄭艷麗留守到黃離世為止，堪稱有情有義。冇咩戲拍嘅鄭艷麗偶而靠登台搵食，後來索性洗盡鉛華，搬回屋邨居住仲去快餐店打工，點知被周刊影到成為封面人物。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！