Ash前夫向張天賦MC致歉 感Ash狠心絕情：鍾卓穎我恨你

ViuTV選秀真人騷《全民造星IV》參賽者Ash（鍾卓穎）日前承認離婚；同一時間，張天賦（MC）被爆與Ash平安夜結伴行超市，疑似成為令Ash與丈夫分開嘅主因。雖然MC澄清當晚只係去超市買嘢，再會合其他朋友開party，強調自己現階段單身，未考慮拍拖，但Ash嘅台灣前夫就喺噚日（5日）MC開IG Live嗰陣亂入留言，又喺自己IG Story連環出post，令事件充滿花生。

Ash前夫喺MC開IG Live時留言：「如果你真的喜歡Ash，就要好好對她。」並喺自己IG Story寫下字句：「如果真的有甚麼，我希望你可以負責到底，我是說如果真的有甚麼的話。」雖然無指名道姓，但網民估計Ash前夫係向MC放話。不過，噚晚Ash前夫又再出post指呢段期間精神壓力好大，又解釋自己一直以為Ash同MC當晚係去慶功宴，當得知佢哋係參加party後先令佢一時情緒失控：「我一直以為是慶功宴，讓我認為如果，如果，如果真的有什麼，我只希望可以負責，才去留了一句話，如果真的喜歡請一定要負責」，同時向MC致歉：「對不起是我太衝動了，對不起張天賦先生。」，並希望大家唔好因爲佢一時情緒失控打嘅字而誤會佢哋。

不過，Ash前夫對Ash就由愛變成恨，表示唔想再睇到任何關於佢嘅事，又對Ash喺佢飛返台灣當日都無聯繫一事，感到對方好絕情：「我沒想過我會有這麼說的一天，鍾卓穎我恨你，就連最後妳也不來送機，一通電話，一條短訊都沒有，真的很絕。」

相關新聞：Ash前夫開live爆11月已分居 逼簽保密協議兼要即刻離開香港

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！