Ash前夫開live爆11月已分居 逼簽保密協議兼要即刻離開香港

《全民造星IV》參賽者Ash（鍾卓穎）日前承認離婚，同時被爆出與張天賦（MC）平安夜結伴行超市，雖然噚日（5日）MC喺IG開live時已經澄清，並強調自己現階段單身，不過Ash嘅台灣前夫（龍龍）就係直播中留言「如果你真的喜歡Ash，就要好好對她。」，又喺自己IG Story連環出post向MC致歉及話「鍾卓穎我恨你」。去到今朝，前夫再喺個人IG直播中大爆佢同Ash喺11月初已經分居，而家仲被逼簽保密協議，事件令網民爭住食花生。

相關新聞：Ash前夫向張天賦MC致歉 感Ash狠心絕情：鍾卓穎我恨你

前夫喺直播中大爆離婚內幕，指佢同Ash喺11月初已經分居，佢有要求Ash俾佢留喺香港多幾個月，等佢可以賺多啲錢，不過就被拒絕。前夫嘅簽證喺今年3月到期，不過Ash及其家人都唔肯幫佢續期。去到12月尾，雖然前夫嘅簽證仲未到期，不過就被女方要求即刻離開香港。前夫話佢喺香港所賺嘅錢都係由Ash保管，所以二人分居後佢要去做外賣平台外送員，不過佢都唔夠錢返台灣。所以當Ash要求佢即刻離開香港，佢都要借6萬台幣去買機票，同埋作為隔離期間嘅洗費。呢6萬台幣並唔係掩口費，所以佢日後係要還錢。

除此以外，前夫仲話喺分居時要求簽下保密協議書，其中一項就係男方唔可以再聯絡女方，原因係Ash認為前夫會對佢嘅生命造成危險。另外，前夫仲話如果講咗出嚟，佢就唔可以再嚟香港。其後前夫嘅直播突然中斷，而其帳號亦隨即被封。之後前夫開咗新帳戶，不過佢就只係話直播中斷原因係帳戶被封，佢亦表示唔想再討論Ash嘅事情，只想記錄一下自己嘅防疫生活。有網民就猜測係Ash粉絲惡意舉報導致前夫帳戶被封。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！