E-Kids 舊隊友澄清A4團名唔關曾志偉事 阮民安寸爆反擊

由《亞洲超星團》9名成績最好嘅練習生組成嘅男團Loong 9，團名迅即引起討論。廿幾年前被曾志偉同譚詠麟創立嘅Stareast發掘出道嘅男團E-Kids，成員之一Tommy阮民安出POST表示對於Loong 9團名不感意外，仲爆E-Kids出道前原本有另一個團名，聲稱由曾志偉改嘅，叫A4！

但係E-Kids另外2位成員林詠倫Alan同郁禮賢Kasa就分別回應，話A4呢個團名唔係曾志偉改嘅，引發一場羅生門！Alan喺社交平台上出post話「我可以好肯定A4唔係曾志偉改，E-kids又肯定係公司改~好心唔好成日抽水攞光環喇」。咁似乎E-Kids曾經用過A4呢個名喎！Alan之後留言解釋「因為未出道時係4個人，當時經理人改叫(A4)不是曾志偉改的，第二笑A4紙是當時出席某D活動，我哋經理人介紹俾林珊珊識，珊珊姐就開玩笑說4A？紙嚟㗎？」。

Alan之後再直線抽擊Tommy「講真有時唔好咩都出嚟認屎認屁~平時你點話依個話個個都無所謂，但咁屈＿以前扶持過你嘅人我就忍唔住(冒住俾人＿我都係咁講)要記住你自己風光時就係度＿E-kids隊友，有水抽時就爭＿住光環。真係人無恥便無敵！」

另一成員Kasa都就A4呢個團名，講出同Alan相若嘅故事，而且都提到林姍姍開玩笑話「A4?紙嚟㗎？」呢件事。而Kasa更講出E-Kids呢個名嘅來源，係出自譚詠麟。「2000-2001年跟住譚校長走東南亞巡唱，係佢換衫嘅時候，我哋三個真係出嚟唱一隻叫《玩出火》嘅歌。我再照一照鏡會自問 『何得何能有呢個際遇 ？』，相信嗰段時候，運氣行先。但係留意返，每一次譚校長介紹我地出場，都稱呼我地為『Star East新人類』，所以去到後段，譚校長親自改名，係國內某大球場，用mic宣布我哋組合名字名為『E-KIDS』，E for star east，E KIDS就係咁黎。」。同時Kasa亦貼上2000年E-Kids跟校長去雲頂登台演出嘅片段，當年校長的確仲叫佢地做Star East新人類，似乎證明Kasa幾好記性。

而阮民安之後回應網媒時就寸爆2位前隊友，話佢地即使奉承曾志偉同陳百祥，都唔會有機會玩《中年好聲音》。但Alan再出post表示「本人在E-Kids解散後並沒有所謂投靠StarEast任何一位老闆搲撈」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！